ИИВ ЙҲХББ ижтимоий тармоқда «Айтишларича, самосуд қилинаётган фуқаро йўлдаги қоидабузар ҳайдовчиларни суратга олиб, ГАИга жўнатган» сарлавҳаси остида тарқалган видео юзасидан маълумот берди.
Идоранинг Андижон вилояти ИИБ ахборот хизматига таяниб маълум қилишича, 2020 йилнинг 22 декабрь куни соат 11:00 ларда Андижон шаҳрида яшовчи Н.Қ. исмли фуқаро Жалақудуқ тумани марказида жойлашган деҳқон бозорига мевалар нарх-навосини билиш учун келиб, бозорни фотосуратга олаётган вақтида бир неча фуқаро уни бошқа мақсадда суратга олаётганликда гумонлаб, жамоат жойида турли уятли сўзлар билан ҳақорат қилган.
Таъкидланишича, ҳолат юзасидан Жалақудуқ тумани ИИБ XPБ ИИО ТП профилактика катта инспектори томонидан терговга қадар текширув ҳаракатлари ўтказилган.
Жумладан, беш нафар фуқаро жамоат жойида турли ҳақоратли сўзлар билан бақир-чақир қилганлиги учун уларнинг ҳаракатларида Маъмурий жавобгарлик тўғрисидаги кодекснинг 183-моддасида (майда безорилик) кўрсатиб ўтилган ҳуқуқбузарлик аломатлари мавжудлиги боис тўпланган ҳужжатлар чора кўришлик учун Жалақудуқ туман Маъмурий судига юборилган.
25 декабрь куни маъмурий иш судда кўриб чиқилиб, ҳуқуқбузарларнинг ҳар бирига БҲМнинг 3 баравари миқдорида жарима жазоси белгиланган.
Маълумот учун, ҳозирда ЙҲХББнинг «Dyhxx.ejarima.uz» махсус сайти фақат видеорегистраторлардаги ёзувларни қабул қилмоқда. Шу билан бирга, қоидабузарлик содир этилганига уч кундан ва видеонинг давомийлиги 120 сониядан ошмаслиги керак. Шунингдек, уларда содир этилган қоидабузарликнинг санаси ва вақти кўрсатилган бўлиши лозим.
Эслатиб ўтамиз, содир этилган ҳар бир йўл ҳаракати қоидасининг бузилиши борасидаги юборилган видеоёзув учун БҲМнинг 5 фоизи миқдорида мукофот пули берилади. Сайт статистикасига кўра, бугунга қадар 12,5 минг фойдаланувчи 160 мингга яқин қоидабузарлик ҳақида хабар берган.
Изоҳ (0)