Самарқанддаги мактабда қозонхона «котёли» портлаши оқибатида бир киши вафот этди

Самарқанд шаҳридаги мактаблардан бирининг қозонхонасида портлаш содир бўлди, дея хабар берди «Дарё» мухбири.

Айтилишича, воқеа 2021 йилнинг 2 январидан 3 январга ўтар кечаси 4-умумтаълим мактабида содир бўлган.

Аниқланишича, 2 январь, шанба куни, тахминан, соат 23:00 да мактаб ва ушбу ҳудуддаги маҳалларда 40 дақиқа электр узилиши кузатилган. Натижада газ босими кўтарилган. Мактабнинг қозонхона назоратчиси 50 ёшли Ҳ. қозонхонага кирганида, портлаш содир бўлган.

Портлаш натижасида бошидан оғир тан жароҳати олган қозонхона ишчиси Республика шошилинч тез тиббий ёрдам илмий маркази Самарқанд вилоят бўлимига ётқизилган. 3 январь куни кўрсатилган тиббий ёрдамга қарамасдан қозонхона ишчиси вафот этган.

Портлаш натижасида ҳеч қандай ёнғин келиб чиқмаган.