2020 йил дунёдаги барча соҳалар учун синовли келди, дейиш мумкин. Шу қатори ўзбек санъати учун ҳам. Жорий йилда ўзбек санъатининг кўплаб вакиллари, устоз санъаткорлар турли хасталиклар оқибатида ёруғ оламни тарк этди.
Аида Юнусова
Ўзбекистонда хизмат кўрсатган артист Аида Юнусова 21 январь куни 72 ёшда ҳаётдан кўз юмди. У «Ажойиб хаёлпараст», «Чинор остидаги дуэль», «Оловли йўллар», «Олтин куз», «Меҳригиё», «Зулматни тарк этиб», «Карвон», «Анор», «Биринчи йўловчилар» фильмларида суратга тушган. Актриса ўлимидан аввал оғир хасталикни бошдан кечирганди.
Ғайбулла Ҳожиев
Ўзбекистонда хизмат кўрсатган артист Ғайбулла Ҳожиев 26 февраль куни уйқусида вафот этди. 64 ёшида оламдан кўз юмган ижодкор ундан аввал оғир хасталик сабаб театрдан кетишга мажбур бўлганди.
У «Сарбадорлар», «Соҳибқирон», «Меҳробдан чаён», «Афандининг беш хотини», «Пири коинот», «Қирол Лир» ва «Етти фарёд» каби ўнлаб спектаклларда ранг-баранг ролларни ижро этганди.
Азим Суюн
Ўзбекистонда хизмат кўрсатган маданият ходими Азим Суюн 9 март куни 72 ёшида оламдан ўтди.
У Ғафур Ғулом номидаги Адабиёт ва санъат нашриёти, Ўзбекистон Давлат матбуот қўмитаси, «Халқ сўзи», «Ўзбекистон овози» газеталарида, «Гулистон» журналида фаолият юритган.
Ойбарчин Бакирова
Ўзбекистон халқ артисти Ойбарчин Бакирова 20 март куни 70 ёшида оламдан ўтди.
Актриса ўз фаолиятини 1971 йилда «Ўзбекфильм» киностудиясида бошлаган. У кўпчиликка таниш бўлган «Еттинчи жин», «Тангалик болалар», «Водиллик келин», «Армон», «Ўйин» ва «Фарзандим» каби ўнлаб фильмларда турли образларни яратган. Бундан ташқари, у ўзбек дубляж санъатининг етук намоёндаларидан бири эди.
Нозим Аббосов
Кинорежиссёр Нозим Аббосов 21 март куни 58 ёшида оламдан ўтди.
Нозим Аббосов 1962 йилда таниқли режиссёр Шуҳрат Аббосов хонадонида таваллуд топган. Фаолиятини 1984 йилда постановкачи рассом сифатида бошлаган.
У режиссёр сифатида «Феллини», «Ойдиной», «Абадият чархи», «Дилор, Дилор... дил ва ор», «Саид ва Саида» каби фильмларни суратга олган.
Анвар Обиджон
Ўзбекистон халқ шоири Анвар Обиджон 11 апрель куни 73 ёшида вафот этди.
У болалар адабиётига дастлаб «Она Ер» (1974), «Баҳромнинг ҳикоялари» (1984) тўпламлари орқали шоир сифатида кириб келган. Унинг «Масхарабоз бола» (1980), «Оловжон ва унинг дўстлари» (1983), «Эй, ёруғ дунё» (1983), «Кетмагил» (1985), «Безгакшамол» (1985), «Жуда қизиқ воқеа» (1987), «Олтин юракли автобола» (1988), «Даҳшатли Мешполвон» (1990) каби шеърий, насрий китоблари чоп этилган. Кейинги йилларда «Қўнғироқли ёлғончи», «Паҳлавоннинг ўғирланиши», «Рамазон ва Гулмат ҳангомаси» (1992), «Мешполвоннинг жанглари» (1994), «Алишер ила Ҳусайн ёки уч доно ва ўғри» (1996), «Тўтиқуш», «Топсанг ҳай-ҳай…» каби қисса, песа ва шеър, достонларини ҳам эълон қилинган.
Ҳошим Арслонов
Ўзбекистонда хизмат кўрсатган артист Ҳошим Арслонов эса 29 май куни 64 ёшида оламдан ўтди. Фаолияти давомида турли спектакллар, фильм ва сериалларда турли ролларни ижро этган. «Уйғониш», «Марғиёна», «Отамдан қолган далалар», «Алпомиш», «Чавандоз», «Сўзсиз севги», «Динозавр қолдирган из» ва «101 рейс» кабилар шулар жумласидандир.
Абдурайим Абдуваҳобов
Ўзбек миллий академик драма театри актёри, Ўзбекистонда хизмат кўрсатган артист Абдурайим Абдуваҳобов 14 июль куни 57 ёшида вафот этди.
У «Шум бола», «Суюнчи», «Муҳаббат синовлари», «18-квадрат», «Фирибгар», «Осий банда», «Пойга», «Бевалар», «Сўнгги нафасимгача», «Шайтанат», «Назира» каби фильм ва сериаллардаги ҳамда ўнлаб спектакллардаги ажойиб роллари билан томошабинлар хотирасида муҳрланиб қолди.
Дилбар Икромова
Ўзбекистон халқ артисти Дилбар Икромова 25 август куни ўткир пневмония оқибатида 73 ёшида вафот этди.
У «Келинлар қўзғолони», «Чимилдиқ», «Дев билан пакана», «Девона», «Афғон», «Ойқиз эртаги» каби жуда кўплаб фильмларда турли ролларни маҳорат билан ижро этганди.
Маҳмуджон Тожибоев
Ўзбекистон халқ ҳофизи Маҳмуджон Тожибоев 11 июль куни 63 ёшида вафот этди. У шоирнафас ҳофиз сифатида ижро услуби вазминлиги, лирикага мойиллиги, овоз ва чолғу мутаносиблиги билан ажралиб турган. Марҳум ижодкор Осиё, Америка, Европа ва Шимолий Африка мамлакатларида гастролларда бўлган.
Анвар Кенжаев
Ўзбекистонда хизмат кўрсатган артист Анвар Кенжаев 18 июль куни оламдан ўтди. Актёр фаолияти давомида «Энди дадам бўйдоқ», «Сардор», «Учар отлар», «Таъзиядаги тўй», «Ада эмас, дада», «Ойдиной», «Сув ёқалаб», «Йўқолган одам» каби фильмларда роллар ижро этган.
Шукрулло
Ўзбекистон халқ шоири Шукрулло (Юсупов) 19 июль куни 99 ёшида вафот этди.
Унинг «Чоллар» (1948), «Россия» (1956), «Икки қоя» (1964), «26 тонг отари» (1966), «Гул ва оташ» (1972), «Кўнгил чироғи» (1975), «Аср баҳси» (1985) каби достонлари, «Баҳор совғаси» (1962), «Юлдузлар» (1964) каби шеърий тўпламлари, «Хатарли йўл» (1962), «Табассум ўғрилари» (1964), «Тўйдан кейин томоша» (1980), «Ўғрини қароқчи урди» (1982) каби эсселари китобхонлар кўнглидан жой олган.
Руслан Шарипов
Ўзбекистонда хизмат кўрсатган хонанда Руслан Шарипов 28 июль куни 54 ёшида инсульт оқибатида вафот этди.
Унинг ижросидаги «Яйра, Ўзбекистон», «Салом, Наврўз», «Ҳаёт», «Отажоним», «Гўзал ёр», «Тоғда ўсган қиз» каби кўплаб қўшиқлар мухлислар қалбидан жой олган. Юлдуз Усмонова билан бир нечта дуэт қўшиқ куйлаган.
Фатҳулла Маъсудов
Ўзбекистонда хизмат кўрсатган артист Фатҳулла Маъсудов 30 август куни вафот этди. У коронавирусга чалинган эди.
У 1999 йили «Шуҳрат» медалига сазовор бўлган. 2003 йили Ўзбекистон Республикасида хизмат кўрсатган артист унвони билан мукофотланган. 2014 йили «Меҳнат шуҳрати» ордени билан тақдирланган.
Шуҳрат Қаюмов
Ўзбекистонда хизмат кўрсатган артист Шуҳрат Қаюмов 22 сентябрь куни 51 ёшида оламдан ўтди.
Шуҳрат Қаюмов узоқ йиллар «Ўзбекистон» телерадиоканалида «Ассалом Ўзбекистон», «Оҳанграбо» каби кўрсатувларини тайёрлаган.
Омон Матжон
Ўзбекистон халқ шоири, Ўзбекистон Ёзувчилар уюшмаси аъзоси Омон Матжон 29 октябрга ўтар кечаси 77 ёшида Тошкент шаҳрида вафот этди.
Омон Матжон 1943 йили Хоразм вилоятининг Гурлан туманида таваллуд топган. Ўрта мактабни тугатгач, Самарқанд давлат университетида таҳсил олган. 1969—2002 йиллар мобайнида Ғафур Ғулом номидаги Адабиёт ва санъат нашриётида муҳаррир, бўлим бошлиғи, «Ёшлик» журналида бош муҳаррир, «Чўлпон» нашриётида директор бўлиб ишлаган.
Шоирнинг энг яхши шеърлари 20 га яқин шеърий тўпламга жамланган, шунингдек, «Тўрабекахоним» насрий қиссаси ва «Нажмиддин Кубро», «Ардахива» бадиалари чоп этилган. Омон Матжон ижодида «Чўлдагилар» достон хроникаси, «Гаплашадиган вақтлар» шеърий қиссаси алоҳида ўрин эгаллайди. Шоирнинг 2000 йили «Авесто»нинг 2700 йиллигига бағишланган «Ардахива» асари чоп этилган.
Омон Матжон қардош ва чет эл адабиётидан кўплаб намуналарни ўзбек тилига маҳорат билан ўгирган. Хусусан, Фридрих Шиллер, Шарл Бодлер каби жаҳон класциклари, Евгений Евтушенко, Расул Ҳамзатов, Шандор Петефи, Юстинас Марсинкявичюс, Берди Кербобоев, Суҳроб Тоҳир, Ибройим Юсупов сингари шоир ва адиблар ижодидан қилган таржималари эътиборга лойиқ.
Ўзбекистон халқ шоири Омон Матжон ўзбек адабиётнинг ривожи йўлидаги хизматлари учун давлат мукофотига сазовор бўлган.
Омон Матжон қаламига мансуб «Умр ўтар, вақт ўтар» шеъри кўплаб хонандалар томонидан қўшиқ қилиб куйланган ва халқ орасида машҳурликка эришган.
Клара Жалилова
Ўзбекистонда хизмат кўрсатган артист Клара Жалилова 20 ноябрь куни 83 ёшида оламдан ўтди.
Актриса «Мафтунингман», «Келинлар қўзғолони», «Чинор тагидаги дуэль», «Темир хотин», «Темир эркак», «Ниқоб» каби фильмларда ўзга хос ролларни ижро этган. Айниқса, «Мафтунингман» фильмидаги роли ўзбек халқининг юрагидан жой олган.
Саидкарим Саидорипов
«Шум бола» фильмида Омон ролини ижро этган актёр Саидкарим Саидорипов 57 ёшида қандли диабет хасталигидан вафот этди. У 1975 йили «Шум бола» фильмининг кастингида иштирок этиб, бош ролга тасдиқланган. Бироздан кейин режиссёр Дамир Салимов унга Омон роли ишониб топширган. Ёш ижодкор бир неча йилдан сўнг Шуҳрат Аббосовнинг «Оловли йўллар» фильмида ҳам суратга тушган. Аммо ота-онасининг қаршилиги сабаб санъатни тарк этишга қарор қилган.
Изоҳ (0)