Швейцарияга Буюк Британиядан Вербье тоғ-чанғи курортига келган ва сўнгги қоидаларга кўра ўн кун карантинда бўлиши керак бўлган 400 дан ортиқ сайёҳ ғойиб бўлди. Бу ҳақда Daily Telegraph’га таяниб, «Интерфакс» хабар қилди.
Бирлашган Қироллик ҳукумати мамлакатда коронавируснинг янги, юқумли тури аниқланганлигини эълон қилгандан сўнг Швейцария ҳукумати Буюк Британиядан келувчи парвозларни 20 декабрь куни тақиқлади. 14 декабрдан бошлаб мамлакатга кириб келган инглиз сайёҳларига ўн кун давомида шошилинч равишда ўзини изоляция қилиш буюрилди.
Маълум қилинишича, 24 декабрь куни Швейцария ҳукумати инглизлар ўз ватанига қайтишга рухсат берилганлигини эълон қилди. Бунинг учун инглизлар қатор шартларни бажариши ва ҳукуматга ватанларига қайтишда қайси транспортдан фойдаланмоқчи экани тўғрисида хабар бериши керак эди.
Қайд этилишича, 27 декабрь куни эрталаб Вербьедаги меҳмонхона ходимлари инглиз сайёҳлари ҳатто нонушта қилмай дам олиш зоналарини оммавий тарк этганини маълум қилди. Таъкидланишича, Вербьеда карантинга олинган 420 нафар британияликдан фақатгина ўн нафардан камроқ одам қолган.
Вербье жойлашган Вале кантонининг раҳбари Кристоф Дарбелле маҳаллий ҳокимият сайёҳларни карантинда ушлаб туролмаганлиги тўғрисидаги айбловларни рад этди. Унинг сўзларига кўра, чегара аслида «тешикларга тўла», одамлар ҳужжатларни кўрсатмасдан бутун Европа бўйлаб саёҳат қилишлари мумкин ва унга кўра, баъзи британияликлар Вербьедан машинада чиқиб кетишган ва улар ҳозирда Британияда карантин остида.
Шунингдек, у Федерал соғлиқни сақлаш идорасини Британиядан келган барча ҳаво йўловчилари тўғрисидаги маълумотларни кеч узатишда айблади. Идора раҳбарияти ушбу айбловларни рад этди.
Маълумот учун, Швейцарияда мажбурий карантин қоидаларини бузганлик учун жарима миқдори 10000 Швейцария франкини ташкил қилади.
ЖССТ 20 декабрь куни Британияникига ўхшаш коронавирус Нидерландия, Дания ва Австралияда ҳам аниқланганини эълон қилди. Ҳозирда ташкилот бу штаммни ўрганмоқда. Ушбу штамм Франция ва Японияда ҳам қайд этилди, Германия ва Швейцарияда ҳам коронавируснинг «британча штамми», Нигерияда эса бутунлай янги мутацияси аниқланди. Жанубий Корея ва Иорданияда ҳам ушбу штамм билан касалланганлар аниқланди, уларнинг барчаси аввалроқ Британияда бўлиб қайтган.
Изоҳ (0)