Эрон генерал Қосим Сулаймоний ўлдирилишида иштирок этган 48 кишининг рўйхатини тузди. Бу ҳақда Меhr News’га таяниб, «Korrespondent.net» хабар берди.
«Эрон расмийлари Сулаймоний ўлдирилишида иштирок этган 48 кишини аниқлай олди ва уларни жавобгарликка тортиш чораларини кўрди», — деди мамлакат Инсон ҳуқуқлари бўйича кенгаши раҳбари Али Багари Кани. Шунингдек, расмий Теҳрон Ислом инқилоби муҳофизлари корпуси қўмондонини йўқ қилиш операциясида иштирок этган мамлакатларга мурожаат қилиб, маълумот беришни талаб қилган.
Маълум қилинишича, Эрон ҳукумати бундай илтимос билан мурожаат қилган сўнгги мамлакат Германия бўлди.
«Бизга Германиядаги АҚШнинг Рамштейн авиабазаси ва Сулаймоний ўлдириш учун фойдаланилган учувчисиз самолётлар ўртасида маълумотлар алмашинуви бўлгани тўғрисида ҳужжат келиб тушди», – дейди расмий.
Эслатиб ўтамиз, Қосим Сулаймоний 2020 йил 3 январь куни АҚШ ҳаво кучлари томонидан Бағдод аэропортига берилган авиаҳужум оқибатида ўлдирилганди. Зарба АҚШ президенти Дональд Трамп фармойишига асосан берилган.
У ИИМКни террорчилик ташкилоти деб ҳисоблаган ва Қосим Сулаймонийни минтақада, хусусан, Ироқда бўлиб турган америкалик дипломатлар ва ҳарбийларга ҳужум қилишни режалаштирганликда айблаган. Эрон эса унга жавобан Ироқдаги Америка базасига ҳужум қилган. Бунинг оқибатида 100 дан ортиқ америкалик жароҳатланган.
Изоҳ (0)