Наманганда ҳам ичимлик суви ва канализация хизмати нархи оширилади

Наманган вилоятида 2021 йилнинг 10 январидан ичимлик суви таъминоти ва канализация хизматлари тарифлари оширилади. Халқ депутатлари Наманган вилояти Кенгашининг 2020 йил 19 декабрдаги «Наманган сув таъминоти»нинг ичимлик суви ва канализация хизматлари тарифларини тасдиқлаш тўғрисидаги қарори қабул қилинган.

Унга кўра, хизмат кўрсатишдаги харажатларни тўлиқ қоплаш ва «Наманган сув таъминоти»нинг рентабелли фаолият юритишини таъминлаш мақсадида тарифлар оширилмоқда.

Янги белгиланган ичимлик сув ва канализация хизматлари тарифлари аҳоли учун қуйидагича:

• 1 куб метр ичимлик суви махсус устама (50 сўм) билан 2600 сўм;
• 1 куб метр оқова сув хизмати махсус устама (50 сўм) билан 750 сўм.

Вазирлар Маҳкамасининг 2013 йил 6 ноябрдаги қарорига асосан, 2013 йил 1 декабрдан буён:

• сув ўлчаш асбобига эга бўлмаган аҳоли хонадонларига етказиб берилган ичимлик суви учун тўловлар ўрнатилган ичимлик сув тарифларига кўтарувчи 1,5 коэффициент қўллаш йўли билан амалга оширилади;
• сув ўлчаш асбоблари билан жиҳозланмаган ва фуқаролар рўйхатга олинмаган турар жойларда ичимлик суви учун ҳисоб-китоблар ўрнатилган меъёрлар асосида ичимлик сув тарифларига кўтарувчи 1,5 коэффициент қўллаш йўли билан, бир ва икки хонали хонадонларга бир киши, уч хонали хонадонларга икки киши, тўрт хонали хонадонларга уч киши, беш хонали хонадонларга тўрт киши ҳисобида амалга оширилади.

Кўрсатилган ичимлик суви ва канализация хизматлари учун 2021 йил 10 январгача тўлиқ ҳисоб-китоб қилиш сўралган, 10 январдан бошлаб кўрсатилган хизматлар учун янги тарифлар асосида ҳисоб-китоб қилинади (ҳозирги тарифга кўра, Наманган вилоятида ичимлик суви нархи 1 куб метр учун 1200 сўм атрофида).

Аввалроқ Навоийда ичимлик суви ва канализация хизмати нархи қарийб 3 баравар оширилиши маълум бўлганди. Тошкентда ҳам ичимлик суви тарифларини кескин ошириш таклиф этилган. «Тошкент шаҳар сув таъминоти» шаҳарда ичимлик суви ва канализация учун нархлар оширилишига изоҳ бериб, тизим ва тармоқларнинг эскирганлиги туфайли сув таъминотида узилишларнинг олдини олиш, ичимлик суви ва канализация хизматларининг сифатини ошириш бўйича 2021 йилга режалаштирилган тадбирларни инобатга олган ҳолда янги тарифлар бўйича таклифлар тайёрланганини билдирган.