Таиландда халқаро оммавий туризм 2021 йилнинг апрели ўрталаридан, бошқа мамлакатлар билан авиақатновлар йўлга қўйилганидан сўнг, қайта тикланиши мумкин. Бу ҳақда мамлакат Туризм ва спорт вазирлиги раҳбари Пипат Ратчакитпраканга таяниб The Bangkok Post хабар берди.
Вазирнинг аниқлик киритишича, халқаро рейсларнинг қайта тикланиши Таиландда 13—15 апрель кунлари нишонланадиган Сонгкран янги йили олдидан йўлга қўйилади.
Амалдорнинг ҳисоблашича, Таиландда коронавирус билан касалланиш ҳолатлари ортгани сабаб 2021 йилнинг биринчи чорагида хорижлик туристларни жалб этишнинг имкони йўқ. Бироқ бошқа мамлакатлардан келадиган йўловчиларга кескин чеклов чораларини қўллаш режалаштирилмаган, чунки айни вақтда туристлар томонидан талаб жуда кам.
Пипат Ратчакитпраканнинг сўзларига кўра, коронавирусга қарши вакцинация туризм соҳасининг қайта тикланишига таъсир кўрсатмайди. Дунёнинг кўплаб давлатларида фуқароларни эмлаш бошланганига қарамай, Таиланд ҳукумати бу каби чораларини ҳозирча кўриб чиққани йўқ.
«Соғлиқни сақлаш вазирлиги кутиб туриш қарорига жуда жиддий ёндашади ва дори воситаларининг салбий таъсирини яхшилаб ўрганади. Биз вакцина синовлари ўтказиладиган денгиз чўчқачалари бўлишимиз шарт эмас», — дейди вазир.
Эслатиб ўтамиз, август ойида Таиланд ҳукумати сайёҳлар учун 2021 йилда ҳам чегаралар ёпиқ бўлиши мумкинлигини инкор этмаганди.
Изоҳ (0)