Armaniston bosh vaziri Nikol Pashinyan fikricha, agar Ozarbayjon Armanistonning Syunik viloyatiga tahdid soladigan bo‘lsa, Rossiya bunga aralashadi. Bu haqda “Kommersant” xabar bermoqda.
Hudud aholisi Tog‘li Qorabog‘ yerlarining bir qismi Boku nazorati ostiga o‘tganidan keyin u yerga Ozarbayjonning yangi harbiy postlari joylashtirilishi ularning xavfsizligiga tahdid solishidan xavotir olmoqda.
“Eng asosiy masala — xavfsizlikni ta’minlash… (Chegaradagi) harakatlar natijasida Syunikdagi urushning oldi olindi. Nafaqat bugun, balki umuman ham, chunki biz hozir shunday joylashganmizki, Syunikka nisbatan tajovuzkorlik yuz bergan taqdirda, nafaqat Armaniston qurolli kuchlari, balki Rossiya ham aralashadi. Bu faqat shuning uchun qilingan”, — dedi Pashinyan “Armaniston jamoatchilik televideniyesi”ga bergan intervyusida. Bosh vazirning so‘zlariga ko‘ra, ayni paytda 20 ga yaqin yer uchastkalari bo‘yicha chegara masalalari muhokama qilinmoqda.
Syunik viloyatida Tog‘li Qorabog‘da urushni to‘xtatish haqidagi, yerlarning bir qismini Ozarbayjonga berishni ko‘zda tutuvchi kelishuv tufayli noroziliklar bo‘lib o‘tmoqda. 21-dekabr kuni namoyishchilar Pashinyanning tashrifiga xalaqit berdi — ular trassani to‘sib qo‘ydi. Avvalroq Ozarbayjon harbiy nuqtalari viloyatdagi aholi punktlaridan 70 va 100 km uzoqlikda joylashgan bo‘lsa, kelishuvdan keyin endi chegara aholi punktlaridan bir necha metr masofada joylashmoqda.
Avvalroq Armaniston bosh vaziri Nikol Pashinyan agar xalq uning iste’fosini xohlayotgan bo‘lsa, iste’foga chiqishga tayyorligini ma’lum qilgan edi.
Eslatib o‘tamiz, Rossiya ishtirokidagi muzokaralar natijasiga ko‘ra, nizo tomonlari o‘t ochishni to‘xtatishga qaror qildi. 10-noyabrga o‘tar kechasi Armaniston bosh vaziri Nikol Pashinyan Ozarbayjon va Rossiya prezidentlari Ilhom Aliyev va Vladimir Putin bilan Tog‘li Qorabog‘da o‘t ochishni va jangovar harakatlarni to‘xtatish to‘g‘risida kelishuv imzoladi.
Sulh shartlari Kelbajar, Agdam, Lachin tumanlari va Gazax tumanida Armaniston tomoni egallab turgan hududlar Ozarbayjon nazorati ostiga berilishini nazarda tutadi.
Bahsli hududga 2 mingga yaqin Rossiya tinchlikparvarlari kiritiladi, ular o‘t ochishni to‘xtatish rejimiga rioya qilinishini nazorat qiladi. Shuningdek, tomonlar asirlar, marhumlarning jasadlarini ayirboshlashni boshlaydi va mintaqada transport qatnovini qayta tiklaydi.
Izoh (0)