Пандемия шароитида 2020 йилда соғлиқни сақлаш соҳасида 50 нафар янги миллиардер пайдо бўлди, деб хабар бермоқда «РБК» Forbes’га таяниб.
Қайд этилишича, уларнинг бойлиги вакцина ишлаб чиқарувчи ёки тиббий қурилмалар етказиб бериш билан шуғулланувчи компаниялар акциялари қиймати ошгани ҳисобига ортган. Янги миллиардерларнинг аксарияти вируснинг дастлабки ўчоғи пайдо бўлган Хитойда яшайди.
Forbes нашрига кўра, пандемия пайтида бойиб кетган янги миллиардерлар орасидан қуйидагилар ўрин олди:
Угур Шаҳин — Германиянинг BioNTech биотехнологик компанияси бош директори. У Американинг Pfizer компанияси билан ҳамкорликда самарадорлиги 95 фоизни ташкил этгани эълон қилинган коронавирусга қарши вакцина ишлаб чиқди. Йил бошидан буён компания акциялари 160 фоизга ўсди. Нашрнинг ёзишича, шундай шароитда BioNTech’нинг 17 фоизига эгалик қилувчи Шаҳиннинг бойлиги 4,2 миллиард долларга етди.
Мавзуга доир: Коронавирусга қарши вакцина яратган BioNTech компанияси раҳбари дунёдаги энг бой 500 одам қаторига кирди
Юань Липин — Ду Вэйминнинг собиқ рафиқаси, Shenzhen Kangtai Biological Products кенгаши раиси. Ажрашгандан сўнг, у Хитойнинг етакчи вакцина ишлаб чиқарувчи компанияларидан бири бўлган компаниянинг 24 фоизини қўлга киритган. Хусусан, AstraZeneca ХХРдаги ягона вакцина ишлаб чиқарувчи ҳисобланади. Йил бошидан буён Shenzhen Kangtai Biological Products акциялари 90 фоизга, Юаннинг бойлиги эса 4,1 миллиард долларга ўсган.
Ху Кун — Хитойнинг тиббий қурилмалар, жумладан, небулайзерлар, стетоскоплар ва тонометрлар ишлаб чиқарадиган Contec Medical Systems компанияси раҳбари. Ху Contec Medical Systems компанияси акцияларининг қарийб ярмига эгалик қилади. Акциялар нархи IPO’дан сўнг 150 фоизга ошган. Ху Куннинг бойлиги 3,9 миллиард долларга баҳоланмоқда.
Карл Хансен — Канаданинг сунъий онг ва машинавий ўқитиш технологиялари ёрдамида антитаналар қўллаган ҳолда даволашнинг энг истиқболли усулларини излаш билан шуғулланувчи AbCellera компанияси раҳбари. Forbes’нинг баҳолашича, Хансеннинг бойлиги 2,9 миллиард долларга тенг.
Тимоти Спринжер — Moderna асосчиларидан бири (2 миллиард доллар). Унинг компаниядаги улуши 3,5 фоизни ташкил этади ва тахминан, 1,6 миллиард долларга баҳоланади. Бундан ташқари, Спрингер бошқа бир қатор биотехника компанияларига фаол равишда сармоя киритиб келади.
Сержио Стеванато — Италиянинг Stevanato Group компанияси раҳбари. Компания дунёда шиша флаконлар ишлаб чиқарувчи иккинчи йирик компания ҳисобланади. Forbes маълумотларига кўра, компания ишлаб чиқарадиган идишлар коронавирусга қарши 40 дан ортиқ вакцина учун қўлланади. Нашр Стеванато бойлигини 1,8 миллиард долларга баҳолаган.
Forbes’нинг ёзишича, 2020 йил охирига келиб дунёдаги 2,2 мингдан ортиқ миллиардер 1,9 триллион долларга бойиб кетди. Барча миллиардерларнинг умумий бойлиги 11,4 триллион долларга баҳоланмоқда — бу уларнинг 2019 йил 31 декабрь ҳолатига нисбатан 20 фоизга кўп. Миллиардерлар бойлигининг ошишига асосий сабаб йил давомида давом этган фонд бозорларидаги қимматбаҳо қоғозлар нархининг ўсиши бўлди.
Йил давомида ҳаммадан кўра SpaceX ва Tesla раҳбари асосчиси Илон Маскнинг бойлиги ўсиб, 110 миллиард доллардан 137 миллиард долларга етди. У дунёдаги энг бой одамлар рейтингида учинчи ўринга кўтарилди. Маск бойлигининг ўсишини 630 фоизга қимматлаган Tesla Motors акциялари таъминлади.
Изоҳ (0)