ОАВ: АҚШда Pfizer вакцинаси билан эмланган тиббиёт ходимида аллергик реакция кузатилди

Нью-Йоркда тиббий ходимлардан бири Американинг Pfizer компанияси ишлаб чиқарган коронавирусга қарши вакцина билан эмланганидан кейин кучли аллергик реакцияни бошидан ўтказди, деб ёзади «РБК».

Newsweek газетаси ўз манбаларига таяниб хабар беришича, ҳодисадан кейин тиббий ходим касалхонага ётқизилган. Айни пайтда унинг аҳволи барқарор деб баҳоланмоқда.

Нашр ҳамсуҳбатлари маълум қилишича, бу Нью-Йоркда ушбу дорига нисбатан аниқланган биринчи аллергик реакциядир. Вакцинация қаерда ва қачон амалга оширилгани айтилмаяпти.

«Вакциналар, ҳақиқатан ҳам, иккиламчи таъсирларга ва аллергик реакцияларга эга, улар кам учраса-да, юз бериши мумкин. Биз шуни ҳам биламизки, клиник синовлар ва бошқа юрисдиксияларда иккиламчи таъсирлар ҳақидаги хабарларга асосланганда, Pfizer вакцинаси билан боғлиқ бундай реакциялар кам бўлса-да, рўйхатга олинган», — дейилади Нью-Йорк Соғлиқни сақлаш ва руҳий гигиена департаменти баёнотида.

Муассаса тиббий ходимларга беморлар эмланганидан кейин 15 дақиқа давомида уларнинг организми вакцинага қандай реакция кўрсатишини кузатиб туришни маслаҳат берди. Илгари аллергик реакцияларни бошдан кечирган беморларни эмлаганда эса 30 дақиқа кузатув олиб бориш тавсия этилди.

Аввалроқ АҚШнинг Аляска штати Жуно шаҳридаги Бартлетт минтақавий касалхонасида Pfizer ва BioNTech компанияларининг коронавирусга қарши вакцинаси билан эмланган икки нафар тиббиёт ходимининг мазаси қочган эди.

Эслатиб ўтамиз, АҚШда 14 декабрь куни коронавирусга қарши эмлаш бошланди. Биринчи навбатда касалланганлар билан ишлаётган тиббиёт ходимлари эмланмоқда. Касалликлар назорати ва профилактикаси марказлари (CDC) маълумотларига кўра, 2020 йил охиригача Америка ҳукумати 40 миллион кишини эмлашни режалаштирмоқда.

2 декабрь куни Буюк Британия дунёда биринчи бўлиб Pfizer’нинг коронавирусга қарши вакцинасидан фойдаланишни маъқуллаган эди. Шундан кейин Британия дунёда биринчи бўлиб коронавирусга қарши вакцинацияни бошлаши хабар берилди. Вакцинациянинг биринчи кунида илгари аллергияси бўлган икки тиббиёт ходимида анафилактик реакция кузатилгач, ҳукумат олдиндан жиддий аллергияси бўлганларни Pfizer ва BioNTech вакцинаси билан эмлашни тақиқлаб қўйди.