АҚШ Россияни Навальнийнинг заҳарланиши борасида фитна назарияларини яратишда айблади. АҚШ янги санкцияларни тайёрлаётгани хабар берилди

АҚШ Давлат департаменти Россия ФХХ (Федерал хавфсизлик хизмати) ходимларини россиялик сиёсатчи Алексей Навальнийни «Новичок» гуруҳидаги заҳар ёрдамида заҳарлаганликда айблади. Бу ҳақда Давлат департаменти вакили CNN’га берган интервьюсида айтиб ўтди, деб ёзади Meduza.

«АҚШ фикрича, Россия ФХХ ходимлари жаноб Навальнийни заҳарлаш учун ‘Новичок’ асаб-фалажлик моддасидан фойдаланган. Жаноб Навальнийнинг заҳарланишини Россия ҳукуматининг иштирокидан бошқа ҳақиқатга яқин изоҳи йўқ. Албатта, президент Путин ва Россия ҳукумати бизнинг бошқача ўйлашимизни хоҳлайди», — деди у.

Давлат департаменти вакили айтишича, Россиянинг Алексей Навальнийнинг заҳарланиши ҳақидаги саволларга жавоб бера олмаслиги кўп нарсани англатади.

«Россия кўплаб, асосан бир-бирига зид бўлган фитна назарияларини илгари сурди. Келинг, очиқчасига гаплашамиз: бундай фитна назариялари Россия ҳукумати олдида турган ва ҳали жавобини кутаётган жиддий саволлардан эътиборни чалғитиш усулидан бошқа нарса эмас», — дея таъкидлади у.

CNN Давлат департаменти баёнотини Дональд Трамп маъмуриятининг Навальнийнинг заҳарланиши ҳақидаги энг қатъий изоҳи деб атамоқда. Телеканал россиялик мухолифатчи билан боғлиқ ҳодиса юзасидан идорага олдинроқ бир неча марта сўровлар жўнатган эди.

Давлат департаменти Россия ҳодиса учун жавобгарликка тортилмагани сабаби, шунингдек, идора нима учун аввалроқ баёнот бермагани ҳақидаги саволларга жавоб бермади.

CNN’нинг икки манбаси маълум қилишича, АҚШ Алексей Навальнийнинг заҳарланиши туфайли Россияга нисбатан санкцияларни тайёрлаб қўйган, аммо уларни киритиш учун бутун ҳукумат ва Дональд Трампнинг тасдиғи керак, у эса бунгача мухолифатчининг заҳарланишида Россияни бевосита айбламаган эди.

14 декабрь куни Навальнийнинг заҳарлангани бўйича The Insider, Bellingcat ва CNN’нинг Der Spiegel иштирокида ҳамкорликда ўтказилган текширув натижалари эълон қилинди. Тергов муаллифлари сиёсатчига суиқасд Томскда ФХХ криминалистика институти ниқоби остида ҳаракат қилган ФХХ махфий бўлимининг саккиз нафар тезкор ходими томонидан амалга оширилган, деган хулосага келди. Тергов ҳужжатида суиқасд тафсилотлари ҳам, унда иштирок этган ФХХ ходимларининг исм-шарифлари ҳам ошкор қилинди, улардан бири Константин Кудрявсев бўлиб чиқди.

Алексей Навальнийнинг иддаолари ортидан Владимир Путин ҳам воқеага ўз муносабатини билдирди.

«Берлин клиникасидаги ўша беморга келсак, мен кўп марта айтганман, фақат баъзи нарсаларни такрорлашим мумкин. Кеча Песков менга бу ҳақдаги сўнгги уйдирмалар ва бизнинг махсус хизматчиларимиз маълумоти ҳақида хабар берди. Бу қандайдир тергов эмас, бу Америка махсус хизматларининг материалларини легаллаштириш. Бизнинг махсус хизматларимиз буни билади ва маъқул топса, телефондан фойдаланади», — деди у. Путиннинг фикрича, «Берлин клиникасидаги бемор» Америка махсус хизматлари кўмагидан фойдаланади, Россия махсус хизмат ходимларига эса уни ўлдиришга ҳожат йўқ эди.

21 декабрь куни россиялик сиёсатчи Алексей Навальний «Мен ўз қотилимга телефон қилдим. У тан олди» номли видеороликни эълон қилди. Видеода Навальнийнинг айтишича, у ўзининг заҳарланиши ортида Федерал хавфсизлик хизматининг гуруҳи тургани ҳақидаги суриштирувни эълон қилишдан олдин гуруҳ аъзоларидан бири — Константин Кудрявцев билан гаплашган ва Кудрявцев Навальнийни ўлдиришга ҳаракат қилинганини тасдиқлаган.