Исроилда 27 декабрь соат 17:00 дан янги — пандемия бошидан буён учинчи карантин бошланади. Бу ҳақдаги қарор мамлакат ҳукумати томонидан Соғлиқни сақлаш вазирлиги таклифига асосан қабул қилинди, деб хабар бермоқда «Интерфакс».
Карантин икки ҳафтадан кўпроқ ёки суткалик касалланиш кўрсаткичи 1000 кишига қисқаргунча давом этади. Ҳозирги пайтда бир суткада аниқланаётган янги ҳолатлар сони 4000 тага яқинлашмоқда.
27 декабрдан Исроилда ноозиқ-овқат савдоси билан шуғулланувчи барча дўконлар фаолиятини тўхтатади, барча кўнгилочар тадбирлар тақиқланади. Мижозлар билан тўғридан-тўғри ишламайдиган компаниялар иш жойидаги ходимлари сонини икки баравар қисқартириши керак бўлади. Шунингдек, жамоат транспорти фаолияти қисман чекланади.
Аввалги карантинлардан фарқли равишда болалар боғчалари, шунингдек, мактабларнинг кичик ва катта синфлари дарсларни давом эттиради, бироқ таълим жараёни қисқартирилган жадвал асосида олиб борилади.
Фуқаролар ўз уйидан бир километрдан узоқ масофага кетиши тақиқланади, болаларни мактабга олиб бориш ёки эмлаш учун бориш бундан мустасно. Меҳмонга ёки қариндошларни кўришга бориш тақиқланади, бироқ кўчада спорт билан шуғулланиш мумкин бўлади.
Мамлакат расмийлари Рождество байрамларида 24 декабрь куни кечқурундан 25 декабрь соат 20:00 гача, шунингдек, 6 январь кечқурундан 7 январь куни кечқурунгача байрам ибодатларини ўтказишга рухсат беради.
Исроилда коронавирусга қарши эмлаш бошланди, бунинг учун Pfizer ва BioNTech компаниялари томонидан яратилган вакцинадан фойдаланилмоқда.
Исроилда 23 декабрь куни коронавируснинг Буюк Британияда аниқланган штамми билан касалланган тўрт киши аниқланган.
Аввалроқ Исроил ҳукумати коронавируснинг янги штамми туфайли хорижликларнинг мамлакатга киришини тақиқлагани ҳақида хабар берилганди.
Изоҳ (0)