Коронавирусдан вафот этган италияликларнинг қариндошлари ҳукуматни судга берди. Улар 100 млн евро товон пули талаб қилмоқда

Италиянинг Ломбардия провинциясида коронавирус оқибатида вафот этган, тахминан, 500 кишининг қариндошлари мамлакат ҳукуматини судга берди. Бу ҳақда Meduza хабар қилди.

Фуқаролик даъвоси Римдаги судга тақдим этилган, унинг қиймати 100 миллион еврони ташкил қилади. Иш бўйича жавобгар сифатида мамлакат бош вазири Жузеппе Конте, соғлиқни сақлаш вазири Роберто Сперанца ва Ломбардия губернатори Аттилио Фонтана белгиланган.

Даъвогарларнинг фикрича, 2020 йилнинг февраль ойи охирида коронавирус Ломбардияда тарқала бошлаганда, мамлакат расмийлари умуммиллий карантин ва у билан боғлиқ иқтисодий зарарнинг олдини олиш учун етарлича чора кўрмаган.

Италия коронавирус билан оммавий касалланишга дуч келган ғарб мамлакатларидан биринчиси бўлган. Мамлакат расмийлари биринчи бўлиб умуммиллий карантин эълон қилганди.

Италия коронавирус оқибатида юзага келган ўлимлар сони бўйича Европада биринчи, дунёда эса бешинчи ўринда турибди. Пандемия бошидан буён касаллик асоратлари оқибатида мамлакатда қарийб 70 минг одам вафот этган.

Ломбардияда вафот этганларнинг қариндошлари июнь ойида прокуратурадан расмийларнинг пандемия бошидаги ҳаракатлари сабабли тергов бошлашни талаб қилган. Жузеппе Конте мазкур терговда гувоҳ сифатида сўроқ қилинган.