Italiyaning Lombardiya provinsiyasida koronavirus oqibatida vafot etgan, taxminan, 500 kishining qarindoshlari mamlakat hukumatini sudga berdi. Bu haqda Meduza xabar qildi.
Fuqarolik da’vosi Rimdagi sudga taqdim etilgan, uning qiymati 100 million yevroni tashkil qiladi. Ish bo‘yicha javobgar sifatida mamlakat bosh vaziri Juzeppe Konte, sog‘liqni saqlash vaziri Roberto Sperantsa va Lombardiya gubernatori Attilio Fontana belgilangan.
Da’vogarlarning fikricha, 2020-yilning fevral oyi oxirida koronavirus Lombardiyada tarqala boshlaganda, mamlakat rasmiylari umummilliy karantin va u bilan bog‘liq iqtisodiy zararning oldini olish uchun yetarlicha chora ko‘rmagan.
Italiya koronavirus bilan ommaviy kasallanishga duch kelgan g‘arb mamlakatlaridan birinchisi bo‘lgan. Mamlakat rasmiylari birinchi bo‘lib umummilliy karantin e’lon qilgandi.
Italiya koronavirus oqibatida yuzaga kelgan o‘limlar soni bo‘yicha Yevropada birinchi, dunyoda esa beshinchi o‘rinda turibdi. Pandemiya boshidan buyon kasallik asoratlari oqibatida mamlakatda qariyb 70 ming odam vafot etgan.
Lombardiyada vafot etganlarning qarindoshlari iyun oyida prokuraturadan rasmiylarning pandemiya boshidagi harakatlari sababli tergov boshlashni talab qilgan. Juzeppe Konte mazkur tergovda guvoh sifatida so‘roq qilingan.
Izoh (0)