Швейцарияда 23 декабрь куни Pfizer/BioNTech препарати билан коронавирусга қарши биринчи вакцинация амалга оширилди. Биринчи вакцинани Люцерн шаҳридаги қариялар уйида яшовчи 90 ёшли аёл олди, деб хабар беради «Korrespondent.net» Swiss Info’га таяниб.
Вакцинациянинг асосий дастури мамлакат доирасида 4 январдан бошланади. Вакцина биринчи навбатда юқори хавф гуруҳга кирадиган кишилар (75 ёшдан ошган, сурункали касалликларга чалинганлар, сўнг 65 ёшдан катталар); тиббиёт ходимлар ёки беморни парваришлаётган шахслар; юқори хавф остида бўлган одамлар билан доимий мулоқотда бўладиган кишилар, касаллик ўчоғи юзага келиши хавфи юқори бўлган жамоат муассасаларида яшайдиган ёки ишлайдиганларга қилинади.
Бир неча кун аввал Швейцария соғлиқни сақлашни тартибга солувчи органи Pfizer/BioNTech вакцинасини тасдиқлади ва бу вакцинанинг буюртма қилинган 3 миллион дозасидан 107 минг дозаси етказиб беришга йўл очди.
Мамлакатда бошқа вакциналар, жумладан, Moderna ва AstraZeneca компаниялари вакциналари кўриб чиқилмоқда. 8,5 миллион аҳолиси бўлган Швейцария ушбу компаниялар ва Pfizer/BioNTech компанияларига 15,8 миллион доза вакцинага буюртма қилган.
Эслатиб ўтамиз, коронавирусга қарши Pfizer вакцинасини бутун дунё бўйлаб тарқатиш ноябрь ойи охиридан бошланди. Британия дунёда биринчи бўлиб ушбу компания вакцинасидан фойдаланишни маъқуллади. Бундан ташқари, АҚШ, Баҳрайн, Мексика, Канадада фойдаланиш учун тасдиқланган. Европанинг дори воситалари бўйича агентлиги (EМА) Европа Иттифоқида Pfizer ва BioNTech компаниялари томонидан яратилган коронавирусга қарши вакцинадан фойдаланишга рухсат беришни тавсия этган.
Изоҳ (0)