Дунёда коронавирус инфекциясига чалиниш бўйича қарийб 78 миллионта ҳолат қайд этилди, деб ёзади Meduza Жонс Ҳопкинс университети маълумотларига таяниб.

Фото: Delfi

Шу тариқа, Ер аҳолисининг 1 фоиздан ортиғи вирусни юқтириб олган. БМТ Аҳоли фонди томонидан Ер аҳоисининг сони айни пайтда 7,795 миллиард киши деб баҳоланмоқда.

Касалланганлар сони бўйича барча дунё мамлакатлари ичида АҚШ етакчилик қилмоқда (18,2 миллион киши). Биринчи учликка Ҳиндистон (10 миллион) ва Бразилия (7,3 миллион) ҳам киради. Улардан кейинги ўринда Россия (2,9 миллион) бормоқда.

Инфекция оқибатида бутун дунёда 1,7 миллион киши вафот этди. Қарийб 44 миллион киши соғайди.

Жаҳон соғлиқни сақлаш ташкилоти (ЖССТ) маълумотига кўра, ўтган бир ҳафта ичида коронавирусга чалиниш ҳолатлари сони бўйича янги рекорд қайд этилган: COVID-19 4,6 миллиондан ортиқ одамда аниқланган, бу ўтган бир ҳафталик кўрсаткичдан 6 фоизга кўп демакдир. Ўлимлар сони эса 4 фоизга ошган.

Сўнгги етти кун ичида энг кўп касалланиш ҳолатлари АҚШда (1,6 миллион, +14%), Бразилияда (326 минг, +8%), Туркияда (194 минг, +11%) ва Россияда (194 минг, +18%) қайд этилган. Касалликни юқтириш ҳолатларининг энг катта қисми Америка мамлакатлари ҳиссасига тўғри келади, Европа эса бир ҳафта ичидаги ўлим ҳолатлари сони бўйича етакчилик қилмоқда.

ЖССТ ҳисоб-китоблари бўйича жами 75 миллион киши коронавирусга чалинган, 1,6 миллион киши вафот этган.