Коронавируснинг янги штамми Буюк Британиянинг турли ҳудудларида, шу жумладан, яқинда чекловларнинг энг қатъий тўртинчи даражаси жорий қилинган ҳудудлар ташқарисида ҳам аниқланди. Бу ҳақда The Guardian нашрига таяниб, «Интерфакс» хабар берди.
«Штамм намуналаридан олинган генетик кетма-кетлик маълумотлари у билан боғлиқ ҳолатлар бутун Бирлашган Қиролликда мавжудлигини аниқ кўрсатмоқда», — дея маълум қилган Кардифф университети профессори Том Коннор.
The Guardian маълумотларига кўра, вируснинг янги штамми намуналари Лондон шаҳри, Кент, Эссекс графликлари, Нориж шаҳри ва бошқа жойлардаги COVID-19 тестининг 2,5 мингдан ортиқ мусбат натижаси туфайли олинган.
Нашрнинг қайд этишича, янги штамм Кент ва Лондондан сентябрь ойининг охиридан бошлаб тарқалмоқда, кейин эса Мидлендс ҳудудига, Англиянинг жануби-ғарби ва шимолига етиб борган. Энг кўп зарарланган ҳудудлар эса Лондон, Англиянинг жануби-шарқи ва шарқи ҳисобланади.
Британия соғлиқни сақлаш тизими маълумотларига кўра, вируснинг янги штамми 70 фоизга юқумлироқ ҳисобланади, бироқ унинг ўлимга олиб келиш хавфи юқорироқ эканлиги ҳақида далиллар мавжуд эмас.
Янги штамм Англиянинг жануби-шарқида сентябрь ойида аниқланган. Ҳозирги пайтда янги штаммнинг қанчалик тез тарқалаётганини аниқлаш, унинг тарқалиши штаммнинг ўзига ёки бошқа омилларга боғлиқлигини билиш учун тадқиқотлар олиб борилмоқда.
Буюк Британия бош вазири 19 декабрь куни ҳукуматнинг янги қарорини эълон қилди. Унга кўра, 20 декабрдан бошлаб Лондон аҳолиси ва Англиянинг деярли бутун жануби-шарқида энг кучли чеклов чоралари жорий қилинди ва аҳолининг ҳаракатланишига чеклов қўйилди.
20 декабрь куни бир қатор мамлакатлар янги штамм билан боғлиқ чекловлар жорий қилингани сабабли Буюк Британиядан келувчилар учун чегараларни ёпишни бошлади.
Коронавируснинг янги штамми
Буюк Британияда коронавируснинг янги тури аниқлангани, шу туфайли мамлакатнинг айрим ҳудудларида касаллик тарқалиш суръати тезлашгани ҳақида 14 декабрь куни маҳаллий Соғлиқни сақлаш вазирлиги раҳбари Мэтт Хенкок маълум қилди. Буюк Британия бош вазири Борис Жонсоннинг сўзларига кўра, ушбу турдаги коронавирус аввалгиларидан 70 фоизга юқумлироқ, лекин ундан хавфлироқ эмас.Жаҳон соғлиқни сақлаш ташкилоти 20 декабрь куни Британияникига ўхшаш коронавирус Нидерландия, Дания ва Австралияда ҳам аниқланганини эълон қилди. Ҳозирда ташкилот бу штаммни ўрганмоқда.
Аввалроқ Жанубий Африка Республикаси (ЖАР)да ҳам ўхшаш мутациядаги вирус топилгани ҳақида хабар берилган эди. Вируснинг янги варианти ҳозирги вакциналар ҳосил қиладиган иммунитетдан кучлироқ бўлиши мумкин, деган тахминлар учун ҳозирча бирор-бир асос йўқ. Буюк Британия 8 декабрь куни Ғарб мамлакатлари орасида биринчилардан бўлиб коронавирусга қарши Pfizer ва BioNTech компаниялари томонидан ишлаб чиқилган дори воситаси билан оммавий вакцинация қилишни бошлаган эди.
Европанинг бир қатор мамлакатлари — Нидерландия, Бельгия, Австрия ва Италия кабилар Буюк Британия билан авиақатновларни тўхтатишини эълон қилиб улгурди. Ирландия, Франция ва Германия, шунингдек, Исроил ҳам шундай қарор қабул қилиш масаласини кўриб чиқмоқда. Bild нашри маълумотларига кўра, Германия канцлери Ангела Меркель Европа Иттифоқидаги ҳамкасблари билан Буюк Британиядан Евроиттифоққа парвозларни 20 декабрь оқшомидан то 2021 йил 6 январигача мувофиқлаштирилган ҳолда тақиқлаш бўйича келишишни режалаштирмоқда. Бундан ташқари, Европа Иттифоқи ва ЖАР ўртасидаги авиақатновлар чекланиши, Буюк Британия билан темир йўл ва паром алоқаси ҳам тўхтатилиши мумкин.
Шунингдек, янги штамм сабаб Саудия Арабистони, Россия ва 20 дан ортиқ мамлакат авиақатновларни чеклади. Шу жумладан, Ўзбекистон ҳам етти давлат билан авиарейсларни тўхтатди.
Изоҳ (0)