АҚШнинг аксарият фуқароларига 600 доллардан тўлаб берилади. Бу иқтисодиётни қўллаб-қувватлаш дастурининг бир қисми

АҚШ Конгресси коронавирус тарқалиши фонида иқтисодиётни қўллаб-қувватлашга қаратилган 892 миллиард долларлик янги пакет лойиҳасини маъқуллади, дея хабар бермоқда «РБК» Reuters’га таяниб.

Шунингдек, Конгресс ҳукуматга 30 сентябргача 1,4 триллион доллар миқдорида маблағ ажратилишини маъқуллаган.

Ёрдам чоралари дастлаб Вакиллар палатаси, бир неча соатдан сўнг Сенат томонидан тасдиқланган. Бу бир ойдан ортиқ давом этган узоқ ва қийин муҳокамадан сўнг конгрессменлар ўртасида келишув натижаси бўлди.

Вакиллар палатаси спикери Ненси Пелосининг таъкидлашича, гарчи демократлар талаб қилган маҳаллий ва давлат органларига ёрдамни ўз ичига олмаган бўлса ҳам у янги пакетни маъқуллайди. Республикачилар вакили Хел Рожерс натижани «ҳаққоний муроса» деб атаган.

Пакет аксарият америкаликларга 600 доллар миқдорида тўловлар, шунингдек, ишсиз қолганларга ҳафталик 300 доллар миқдорида қўшимча тўловларни ўз ичига олган.

Ҳужжатга мувофиқ, кичик бизнес учун кредитлар дастури қарийб 284 миллиард долларга кенгаймоқда. Авиакомпания, мактаб, университет ва корхоналарга ёрдам бериш, шунингдек, коронавирусга қарши вакцинани тарқатиш учун қўшимча маблағлар ажратилади.

Энди янги иқтисодий чораларни қўллаш тўғрисидаги фармонни АҚШнинг амалдаги президенти Дональд Трамп имзолаши керак.

Эслатиб ўтамиз, март охирида АҚШ Конгресси Сенати COVID-19 коронавирус пандемияси шароитида АҚШ компаниялари, аҳолиси ва соғлиқни сақлаш тизимини иқтисодий қўллаб-қувватлаш чора-тадбирлари тўғрисидаги қонун лойиҳасини бир овоздан маъқуллаб, 2,2 триллион доллар миқдорида маблағ ажратган, ушбу молиялаштириш пакети мамлакат тарихидаги энг йириги бўлганди. Апрель ойида эса Конгресс иқтисодиётни қўллаб-қувватлашга яна 484 миллиард доллар ажратиш тўғрисидаги дастурни маъқуллаганди. Баҳорда тасдиқланган кўплаб чоралар муддати тез орада тугайди ва янги чора-тадбирлар пакети уларни узайтиришни назарда тутади.

АҚШ коронавирусга чалинганлар сонига кўра дунёда етакчилик қилмоқда. Reuters’нинг ёзишича, мамлакатда ҳар куни 200 мингтадан ортиқ янги касалланиш ҳолати қайд этилмоқда. 2о декабрь куни 400 мингдан ортиқ одамда коронавирус аниқланганди. Пандемия бошланганидан буён АҚШда 18 миллиондан ортиқ кишида вирус аниқланган, уларнинг 319 минг нафари вафот этган.

Аввалроқ АҚШ Молия вазирлиги иқтисодиётни кучайтиришга 916 миллиард доллар ажратишни таклиф қилгани, мамлакатда шатдауннинг олдини олиш учун бир кунга бюджет қабул қилингани ҳақида хабар берилган эди.