«Мен ўз қотилимга телефон қилдим. У тан олди» — Алексей Навальний ФХХ ходимлари билан ўзининг заҳарланиши бўйича гаплашгани акс этган видеони эълон қилди

Россиялик сиёсатчи Алексей Навальний «Мен ўз қотилимга телефон қилдим. У тан олди» номли видеороликни эълон қилди. Видеода Навальнийнинг айтишича, у ўзининг заҳарланиши ортида Федерал хавфсизлик хизматининг гуруҳи тургани ҳақидаги суриштирувни эълон қилишдан олдин, гуруҳ аъзоларидан бири — Константин Кудрявцев билан гаплашган ва Кудрявцев Навальнийни ўлдиришга ҳаракат қилинганини тасдиқлаган. Бу ҳақда Meduza хабар берди.

Навальнийнинг қайд этишича, қўнғироқ 14 декабрь куни эрталаб — суриштирув эълон қилинишидан бир неча соат аввал амалга оширилган. Сиёсатчининг сўзларига кўра, у «телефон пранкерлари фойдаланадиган энг оддий дастур» ёрдамида ўз рақамини яширган ҳамда унинг ўрнига ФХХ ходимлари бир-бирига қўнғироқларни амалга оширадиган коммутатор рақамини қўйган. «Ҳисоб-китоб оддий. Эрталаб соат еттида қўнғироқ, сен таниш хизмат рақамини кўрасан, гўшакни кўтарасан ва гаплашишни бошлайсан. Мен қўнғироқ қилганларнинг деярли барчаси жавоб берди, деярли барчаси тезда гўшакни қўйди. Кейин эса бизни катта омад кутиб турганди», — дея ҳикоя қилди Навальний. Сиёсатчининг айтишича, у Константин Кудряцев билан 45 дақиқа гаплашишга муваффақ бўлган.

Тўлиқ матни ва аудиоёзуви The Insider томонидан эълон қилинган суҳбатда Навальний ўзини Хавфсизлик кенгашининг котиби Николай Патрушевнинг ёрдамчиси деб таништирган ҳамда раҳбариятга ҳисобот тайёрлаш учун операциянинг баъзи тафсилотларини аниқлаштирмоқчи эканлигини айтган.

Суриштирувда иштирок этган CNN телеканалининг хабар беришича, дастлаб Навальний телефон сўзлашувларида ўзини ҳақиқий исми билан таништирган ва фақат Кудрявцев билан суҳбатда ўзини Патрушевнинг ёрдамчиси сифатида кўрсатган.

Хусусан, Навальний нима сабабдан операция унинг ўлими билан тугамаганини сўраган. Кудрявцевга тегишлилиги Навальний томонидан таъкидланаётган овоз операцияни яхши режалаштирилган деб ҳисоблашини маълум қилган, унинг муваффақиятсизлигини эса вазиятнинг ўзгариши билан боғлаган. Овознинг тахмин қилишича, муваффақиятсизлик самолётнинг Омскка жуда тез қўнгани ҳамда аэропортдаги тез ёрдам гуруҳининг тезкор ҳаракати сабабли юз берган.

Шунингдек, Навальнийнинг суҳбатдоши сиёсатчининг олиб қўйилган кийимларини «Новичок»дан қандай тозалаганини айтиб берган. «Калта иштон (трусик) устида, ички қисмда ишлашни айтишди», — деган телефондаги овоз. Аниқлаштирувчи саволга жавобан Кудрявцев бундай кўрсатма ФХХ ходими Станислав Макшаков томонидан берилганини айтган. Макшаков операцияни амалга оширган гуруҳнинг раҳбари эканлиги тахмин қилинмоқда.

Шунингдек, Кудрявцев операцияда қатнашган яна бир ФХХ ходими — Василий Калашниковнинг фамилиясини тилга олган. The Insider’нинг ёзишича, Калашников биологик намуналардаги нервни фалаж қиладиган агентларнинг метаболитларини аниқлаш соҳасида эксперт ҳисобланади. Маълум бўлишича, Навальний комага тушганидан кейин Станислав Макшаков Калашниковга қўнғироқ қилган.

Навальний яна бир суҳбатни эълон қилган, унда суҳбатдош қандайдир «Михаил» — Кудрявцевнинг сўзларига кўра, Михаил унга тозалаш учун кийимларни берган (The Insider’нинг ёзишича, у ФХХнинг терроризм билан кураш бўйича ҳудудий бошқармаси бошлиғи Михаил Евдокимов ҳисобланади). У Навальний билан операцияни ҳимояланмаган телефон тармоғи орқали батафсил муҳокама қилишдан бош тортган, бироқ сиёсатчининг кийимларини Кудрявцевга берганини тасдиқлаган.

«Новичок»ни яратган олимлардан бири Владимир Углев сентябрь ойида Навальний ички кийим орқали заҳарланганини тахмин қилганди. «Вақт ва динамикага (катта эҳтимол) кўра, Навальний эрталаб соат олтида ўрнидан турган, душ қабул қилган, танасини буғда юмшатган, заҳарланган калта иштонни кийган, самолётда эса заҳарланишнинг жиддий белгилари бошланган», — дея гапирган мутахассис.

Навальнийнинг янги видеосидан кейин Владимир Углев ўз тахминининг мантиғини тушунтириб берган. «Мен заҳарловчи модда айнан калта иштонларга сурилганлигини тахмин қилгандим, чунки бу энг интим нарса бўлиб, унга эгасидан бошқа одам тега олмайди. Бошқа одамларнинг зарарланиш хавфи ҳам йўқ. Албатта, пайпоқлар ҳам бор, бироқ калта иштон остида юмшоқ ва қабул қилувчан тери бор, масалан, товон териси ундай эмас», — дея маълум қилган Углев.