Францияда 27 декабрь, якшанба кунидан фуқаролар коронавирусга қарши эмлана бошлайди, деб ёзади «Коммерсантъ» республика ижтимоий масалалар ва соғлиқни сақлаш вазири Оливье Веранга таяниб. Вакцинация кўнгилли тарзда бўлади, биринчи бўлиб «фуқароларнинг энг заиф гуруҳи» эмланади, дея аниқлик киритди вазир.
«Якшанба куни биз Францияда эмлашни бошлаймиз. Биринчи навбатда вирусга энг чалинувчан фуқаролар эмланади», — деб ёзди Веран Twitter’да. Таъкидланишича, вакцинациядан олдин фуқаролар тиббий кўрикдан ўтказилади ва уларнинг розилиги олинади.
Вераннинг қўшимча қилишича, мамлакатда вирус тарқалиши суръатлари пасайгани йўқ. У фуқароларни Рождество байрамлари чоғида эҳтиёт чораларига амал қилишга чақирди. Бу даврда карантин жорий қилинмайди, бироқ амалдаги чеклов чораларига риоя қилишга тўғри келади, деди вазир.
Жонс Ҳопкинс университети маълумотларига кўра, Францияда коронавирусга чалинганлар сони 2,5 миллион кишига етган. 60,6 минг киши вафот этган, 189 минг киши соғайган.
Ўтган ҳафтада дунёнинг бир қатор мамлакатларида коронавирусга қарши эмлаш бошлаб юборилди. Маълум қилинишича, 1,1 миллиондан ортиқ одам коронавирусга қарши вакцина билан эмланди — булар Буюк Британия, АҚШ, Хитой ва Россия аҳолиси. Энг кўп одам Хитойда эмланган — 28 ноябрь ҳолатига кўра, 650 минг киши эмланган. Буюк Британияда 15 декабрь ҳолатига кўра, коронавирусга қарши 137,8 минг киши вакцинация қилинди, Россияда эса эмланганлар сони 320 минг кишини ташкил этди. Эмлаш 14 декабрда бошланган АҚШда 17 декабрь ҳолатига кўра, қарийб 50 минг киши вакцинанинг биринчи дозасини қабул қилди.
Мавзуга доир:
- Вакцинация янгиликлари, Янги йил олди чекловлар ва давом этаётган Навальний иши. Жаҳон ҳафта ичида
- Коронавируснинг янги, юқумлироқ варианти туфайли 20 дан ортиқ мамлакат авиақатновларни чеклади
- Франция президенти Эммануэль Макронда коронавирус аниқланди
- ЖССТ Янги йилни кўчада нишонлашни тавсия қилди
Изоҳ (0)