ЖССТ COVID-19 мутацияси тарқалишини тўхтатишга чақирди

Жаҳон соғлиқни сақлаш ташкилоти (ЖССТ) коронавируснинг янги, мутацияга учраган турлари тарқалишини секинлаштириш ва тўхтатиш учун мамлакатларни бор имкониятларни ишга солишга чақирди. Бу ҳақда ЖССТ расмий вакили Тарик Язаревич айтиб ўтди, деб ёзади «Коммерсантъ».

«Вируслар циркуляция (айланиш) чоғида ўзгаради, бу эса уларнинг хусусиятлари ўзгаришига олиб келади. Бу вирус тарқалишини секинлаштириш ва охир-оқибат тўхтатиш учун ҳаммамиз чоралар кўришда давом этишимиз керак», — деди Язаревич.

Унинг сўзларига кўра, ЖССТ «Буюк Британия ва Жанубий Африкадаги соғлиқни сақлаш расмийлари ва олимлар билан уларда вирусда аниқлаган ўзгаришлар борасида яқин мулоқотда бўлиб турибди». Унинг аниқлик киритишича, ҳозир бу вирус одамлар орасида қанчалик осон тарқалиши, касалликнинг қай даражада оғир кечишига олиб келиши ҳамда тест ва вакциналар натижаларига таъсир қилиш-қилмаслигини аниқлаш керак.

Ўтган ҳафтада Буюк Британияда коронавируснинг янги варианти аниқланди — дастлабки маълумотларга кўра, у одатдаги коронавирусдан 70 фоизга юқумлироқ, лекин ундан-да хавфлироқ эмас. Бу ҳақда мамлакат бош вазири Борис Жонсон маълум қилди.

Инфекциянинг янги штамми аниқлангани муносабати билан Англия жануби-шарқида, хусусан, Лондонда 20 декабрдан эътиборан чекловларнинг юқори, тўртинчи даражаси жорий этилди, ҳозирча бу тартиб яқин икки ҳафта амалда бўлади. Унга кўра, маҳаллий аҳоли заруратсиз уйдан чиқиши, шунингдек, Янги йил байрами тантаналарида бир неча оила бўлиб тўпланиши мумкин эмас. Хавфнинг тўртинчи даражаси эълон қилинган ҳудудларда фақат дорихоналар ва биринчи зарурат дўконлари ишлайди. Худди шундай чекловлар 20 декабрдан Уэльсда, 26 декабрдан эса Шотландияда ҳам жорий этилади.

Жаҳон соғлиқни сақлаш ташкилоти 20 декабрь куни Британияникига ўхшаш коронавирус Нидерландия, Дания ва Австралияда ҳам аниқланганини эълон қилди. Аввалроқ Жанубий Африка Республикаси (ЖАР)да ҳам ўхшаш мутациядаги вирус топилгани ҳақида хабар берилган эди. Вируснинг янги варианти ҳозирги вакциналар ҳосил қиладиган иммунитетдан кучлироқ бўлиши мумкин, деган тахминлар учун ҳозирча бирор-бир асос йўқ.

Шу муносабат билан 20 дан ортиқ мамлакат авиақатновларга чекловлар киритди. Австрия, Аргентина, Бельгия, Болгария, Германия, Исроил, Эрон, Ирландия, Италия, Канада, Колумбия, Кувайт, Латвия, Литва, Марокаш, Нидерландия, Руминия, Туркия, Хорватия, Финляндия, Франция, Чили, Чехия, Швейцария, Эстония турли муддатларга Буюк Британиядан парвозларни тўхтатган. Дания вазиятга баҳо бериб, қандай чоралар талаб қилинишини тушуниб олиш учун ўз ҳаво ҳудудини Буюк Британиядан келадиган самолётлар учун 48 соатга ёпиб қўйди. Польша 21 декабрь куни ярим тундан самолётлар парвозини бекор қилди. Рейслар қачон қайта тикланиши номаълум.