Жиноят ишлари бўйича Асака туман суди томонидан «UzAuto моторс»га ишга олиб кириб қўяман деб ўнгга яқин одамларни чув туширган собиқ Асака туман бандликка кўмаклашиш маркази инспектори ҳамда Андижон шаҳридаги адвокатлик бюроси иш юритувчисига суд ҳукми ўқилди. Бу ҳақда «Дарё»га судья Алишер Холбоев хабар берди.
Маълум бўлишича, муқаддам саккиз маротаба судланган 2019 йилнинг май ойидан 2020 йилнинг январь ойига қадар Асака туман бандликка кўмаклашиш марказида ишлаган О.З. бир нечта фуқароларнинг ишончига кириб, уларни «UzAuto моторс» АЖ ҳамда жамият негизидаги корхоналарга мансабдор танишлари орқали ишга жойлаштириб қўйишини ваъда берган. Одамларни алдаб, фирибгарлик йўли билан пора тариқасида йирик миқдордаги пулларни олиб, шахсий эҳтиёжлари учун сарфлаб юборган.
Жумладан, Асака туманида яшовчи фуқаро Гулчирой Турсунбоевадан фарзанди Анвар Улуғбековни жамиятга ишга жойлаштириб қўйишини ваъда қилиб, эвазига 1000 доллар талаб қилган ва улардан 2019 йилнинг сентябрь–октябрь ойларида жами 1100 доллар ҳамда 1 миллион 761 минг сўм пулни фирибгарлик йўли билан қўлга киритган.
Бундан ташқари О.З. жиноий ҳаракатларини давом эттириб, муқаддам Андижон шаҳридаги адвокатлик фирмасида иш юритувчи бўлиб ишлаган аёл жиноий шериги Ў.Ю. билан тил бириктириб, 10 нафар фуқародан ўзи ва фарзандларини ишга жойлаштиришини айтиб, жами 15 минг доллар пул маблағларини ўзлаштирган.
Суд судланувчилар, жабрланувчилар ва гувоҳларнинг кўрсатувларини тинглаб, ишда мавжуд бўлган далилларга таяниб, судланувчи О.З.ни Жиноят кодексининг 168-моддаси 3-қисмининг «б» банди (такроран ёки хавфли рецидивист томонидан фирибгарлик), 28,211-моддаси 2-қисмининг «а» банди (Пора бериш) билан айбдор деб топган. Ва уни 3 йил муддатга мансабдорлик ва моддий жавобгарлик лавозимларида ишлаш ҳуқуқидан маҳрум қилиб, 6 йил 6 ой муддатга озодликдан маҳрум қилган. Шунингдек, айбланувчи Ў.Ю. ҳам юқоридаги моддалар билан айбли деб топилиб, унга нисбатан 2 йил муддатга мансабдорлик ва моддий жавобгарлик лавозимларида ишлаш ҳуқуқидан маҳрум қилиш ва 5 йил 2 ой муддатга озодликдан маҳрум қилиш жазоси тайинланган.
Шунингдек, судланувчилар томонидан 10 нафар фуқарога етказилган 11 минг долларга яқин пул маблағлари пора предмети бўлгани сабабли, давлат фойдасига солидар тартибда, қолган 2400 доллар пул маблағлари эса жабрланувчи Ғ.А. ҳамда Г.Т.лар фойдасига ундирилиши белгиланган.