Наманганда Hyundai автозаводи қурилиши бўйича Ўзбекистон томони барча мажбуриятларини бажарган. Бу ҳақда вилоят ҳокими Шавкатжон Абдураззақов халқ депутатлари Наманган вилоят Кенгаши сессиясидаги мурожаатидан сўнг ўтказилган матбуот анжуманида маълум қилди, дея хабар беради «Дарё» мухбири Азизбек Абдувалиев.
Жумладан, «Наманган» эркин иқтисодий зонаси ҳудудидан жой ажратилган, ҳамкорлик шартномалари имзоланган. Бироқ Жанубий Корея томони таъсисчилари (жами учта) таркиби ҳамда мазкур компаниялар бозори географиясидаги ўзгаришлар туфайли лойиҳа вақтинча тўхтаб қолган.
«Ҳоким сифатида иш бошлаганимга уч ой тўлган бўлса, шу масалада икки маротаба музокаралар ўтказдик. Корея томонидан бошқа таъсисчи қўшилган янги шартнома таклиф этилди. Қўшимча инвестициялар киритиш, корхонани ривожлантириш бўйича. Уни ҳам имзоладик. Энди Корея томони шартномани имзолаши керак. Мақсадимиз лойиҳани ўз ҳолига ташлаб қўйиш эмас, балки юргизиш, охирига етказиш. Бир ой муддатимиз бор, жавобини кутяпмиз», — деди Шавкатжон Абдураззақов.
Эслатиб ўтамиз, Наманганда Hyundai автомобиллари ишлаб чиқариш лойиҳасини амалга ошириш бўйича инвестицион шартнома 2018 йил ноябрида имзоланган, 2019 йил сентябрида завод илк маҳсулотларини тақдим этиши кўзда тутилганди. Автозаводда йилига 2,5 мингта кичик юк машинаси, микроавтобус ҳамда автобус ишлаб чиқарилиши режалаштирилган.
Изоҳ (0)