Агар Ўзбекистонда 30-40 йил аввал илм олишга эътибор берилганида ҳар бир фуқарода бир кечада дунёнинг энг бой одами бўлиб қолиш имкони бўлар эди. Бу ҳақда 18 декабрь куни Тошкент ёшлар форумининг очилиш маросимида Тошкент шаҳар ҳокими Жаҳонгир Ортиқхўжаев маълум қилди, дея хабар бермоқда «Дарё» мухбири.
Форумнинг очилиш маросимида пойтахт ҳокими пандемия ва коронавирусга даво топиш ҳақида ўз фикрларини баён қилди.
«Пандемия даврини бошдан кечирдик. Буни Учинчи жаҳон уруши, десам ҳам бўлади: 70 миллион инсон касалланди, 2 миллионга яқин инсон ҳалок бўлди – бу ҳақиқий Учинчи жаҳон уруши. Бугунги кунда инсонлар танклар, самолётлар билан эмас, ақл билан ғалаба қозонмоқда. Кимда ақл бўлса – муҳандислар, олимлар ғалаба қозонмоқда.
Бугун ҳар бирингизда эрталаб туриб дунёнинг энг бой инсони бўлиб қолиш имкони бор, бу ҳам илм билан, яъни ушбу касалликка даво топган одам бой инсонга айланади. Қанийди 30-40 йил аввал илмга эътибор берганимизда эди, бугун ҳар биримизда бир кечада дунёнинг энг бой одами бўлиб қолиш имкони бўлар эди. Аммо бу каби муаммолар жуда кўп чиқаверади, агарда биз илмни кетидан қувсак, яратиб берилган имкониятлардан тўлиқ фойдалансак, ёшлар бирлашса, кун келади – сизлар дунё тараққиётининг эгаси бўласизлар.
Ҳаммангиз спортда, маданиятда миллат қаҳрамони бўлишга тайёр инсонсиз. Фақат бугундан бошлашингиз зарур.
Аввалроқ Ёшлар форуми учун бюджетдан қанча маблағ сарфланиши ҳамда Жаҳонгир Ортиқхўжаевнинг тиктокерлар билан ёшлар учрашувидан нима мақсад кўзлангани ҳақида хабар берилган эди.
Изоҳ (0)