Agar O‘zbekistonda 30-40 yil avval ilm olishga e’tibor berilganida har bir fuqaroda bir kechada dunyoning eng boy odami bo‘lib qolish imkoni bo‘lar edi. Bu haqda 18-dekabr kuni Toshkent yoshlar forumining ochilish marosimida Toshkent shahar hokimi Jahongir Ortiqxo‘jayev ma’lum qildi, deya xabar bermoqda “Daryo” muxbiri.
Forumning ochilish marosimida poytaxt hokimi pandemiya va koronavirusga davo topish haqida o'z fikrlarini bayon qildi.
“Pandemiya davrini boshdan kechirdik. Buni Uchinchi jahon urushi, desam ham bo‘ladi: 70 million inson kasallandi, 2 millionga yaqin inson halok bo‘ldi – bu haqiqiy Uchinchi jahon urushi. Bugungi kunda insonlar tanklar, samolyotlar bilan emas, aql bilan g‘alaba qozonmoqda. Kimda aql bo‘lsa – muhandislar, olimlar g‘alaba qozonmoqda.
Bugun har biringizda ertalab turib dunyoning eng boy insoni bo‘lib qolish imkoni bor, bu ham ilm bilan, ya’ni ushbu kasallikka davo topgan odam boy insonga aylanadi. Qaniydi 30-40 yil avval ilmga e’tibor berganimizda edi, bugun har birimizda bir kechada dunyoning eng boy odami bo‘lib qolish imkoni bo‘lar edi. Ammo bu kabi muammolar juda ko‘p chiqaveradi, agarda biz ilmni ketidan quvsak, yaratib berilgan imkoniyatlardan to‘liq foydalansak, yoshlar birlashsa, kun keladi – sizlar dunyo taraqqiyotining egasi bo‘lasizlar.
Hammangiz sportda, madaniyatda millat qahramoni bo‘lishga tayyor insonsiz. Faqat bugundan boshlashingiz zarur.
Avvalroq Yoshlar forumi uchun budjetdan qancha mablag‘ sarflanishi hamda Jahongir Ortiqxo‘jayevning tiktokerlar bilan yoshlar uchrashuvidan nima maqsad ko‘zlangani haqida xabar berilgan edi.
Izoh (0)