Google кичкинтой Йоданинг уч ўлчамли тасвирини тақдим этди. Уни оддий смартфон ёрдамида томоша қилиш мумкин

Оддий смартфон ёрдамида «Мандалориялик» сериалининг машҳур қаҳрамонини қўшимча реаллик орқали томоша қилиш имконияти пайдо бўлди, деб хабар беради Hi-Tech.Mail.ru.

Google айрим сўровларнинг уч ўлчамли моделларини тақдим этади. Яқинда компания яна 50 та ҳайвонни рўйхатга қўшгани ва фойдаланувчилар смартфон экрани орқали уларнинг 3D кўринишини томоша қилишлари мумкинлиги тўғрисида хабар берилганди. Технология жуда қизиқарли бўлиб, нафақат хонада, балки кўчада ҳам ишлайверади.

Афтидан, компания ҳайвонлар билан чекланиб қолмаган кўринади — қидирув тизими «Мандалориялик» сериалининг машҳур қаҳрамони Грогуни томоша қилиш имкониятини ҳам тақдим этди. Норасмий равишда уни «кичкинтой Йода» деб аташади. Ушбу қаҳрамон «Юлдузлар жанги» сагасининг ишқибозлари орасида жуда машҳур.

Қаҳрамоннинг анимация моделини томоша қилиш учун Google’га «Грогу» дея сўров юбориш ва тегишли тугмани босиш лозим.

Кичкинтой Йодани мобил дастур ўрнатилганидан кейингина хона шароитида томоша қилиш мумкин бўлади. Шунингдек, Google’нинг қўшимча реаллиги веб-камерали десктопда текшириб кўрилган, бироқ у ишламаган. Эҳтимол, уч ўлчамли объектларни фақат смартфонда кўриш мумкиндир.

Кичкинтой Йода ижтимоий тармоқларда шу қадар машҳурликка эришганки, ундан ҳатто арча ўйинчоғи сифатида ҳам фойдаланишмоқда.

https://twitter.com/taylorjane___/status/1335719391061815298