AQShning Kaliforniya shtatida yashovchi Deniyel Kim Fullerton shahridagi Sen-Jud tibbiy markazidan kasalxona xodimlarining olqishlari ostida chiqdi. 49 yoshli erkak bu yerga avgustda COVID-19 tashxisi bilan yotqizilgan edi, deb yozadi Yahoo! News.
Deniyel kasalxonada koronavirusga chalingan bemor uchun eng uzoq muddat — besh oy yotdi, shundan ikki oyini sun’iy nafas oldirish apparatiga ulangan holda, ya’ni sun’iy koma holatida o‘tkazdi. Ammo yurishga yordam beruvchi maxsus vosita va kislorod balloni yordamida bo‘lsa ham, nihoyat u uyiga qaytdi.
“Komadan chiqqanimdan keyin, kasalxonadan bunday chiqib keta olaman, deb hech o‘ylamagan edim, lekin bilasizmi, bugun chiqa oldim”, — dedi u.
Kimning aytishicha, uning tirik qolish imkoniyati kam ekanligini o‘zi bilgan — u qandli diabet, gipertoniyadan azob chekadi, COVID-19 tashxisi qo‘yilganida esa ortiqcha vazni ham bor edi.
“To‘g‘risini aytsam, bu virusni rostakamiga yuqtirib olmagunimcha, unga yangiliklarda aytilayotgan oddiy narsadek qaradim. Xo‘p, niqob taqishim kerak, xo‘p, qo‘limni yaxshilab yuvishim kerak. Ammo haqiqatda bu virusni yuqtirganimdan keyingina u menga haqiqat bo‘lib tuyuldi. Bu juda xavfli va hayot uchun xatarli virus”, — dedi Deniyel Kim.
Kim kasallikka qarshi kurashish yo‘lida yolg‘iz bo‘lmadi, unga doktorlar, hamshiralar, terapevtlar hamda boshqa bir tibbiyot markazida hamshira bo‘lib ishlaydigan singlisi Juli hamrohlik qildi.
“Men juda qo‘rqdim va juda xavotirlandim. Haqiqatda qo‘rqinchli lahzalarni boshdan kechirdim”, — dedi Juli.
Sent-Jud tibbiyot markazining intensiv davolash bo‘yicha mutaxassisi Maykl Kats Kimning og‘ir sinovlarni boshidan kechirganiga guvoh bo‘ldi, endi esa uning sog‘aygani umid uchqunlarini uyg‘otganini aytmoqda.
“Fikrimcha, bu shunday vaziyatki, bitta odamning boshidan kechirganlari bu bosqichdagi yuz minglab kishilarning og‘ir ahvolini ko‘rsatib bera oladi. Bu haqiqatda bir mohiyatga ega. Deniyelning sog‘aygani — umid belgisidir”, — dedi u.
Kim qaytadan yurishni o‘rganmoqda, u o‘ziga hamma narsada yana bir imkoniyat berilganidan juda xursand.
“Men o‘zim boradigan joylarga, yeydigan narsalarimga, gapiradigan gaplarimga diqqatliroq bo‘lmoqchiman. Ya’ni hayotga boshqacharoq nuqtayi nazardan qarayman”, — dedi Kim.
Izoh (0)