Россия президенти Владимир Путин сиёсатчи Алексей Навальнийни Федерал хавфсизлик хизмати (ФСБ) ходимлари томонидан заҳарлангани юзасидан ўтказилаётган текширувга муносабат билдирди. Бу ҳақда Meduza хабар бермоқда.
«Берлин клиникасидаги ўша беморга келсак, мен кўп марта айтганман, фақат баъзи нарсаларни такрорлашим мумкин. Кеча Песков менга бу ҳақдаги сўнгги уйдирмалар ва бизнинг махсус хизматчиларимиз маълумоти ҳақида хабар берди. Бу қандайдир тергов эмас, бу Америка махсус хизматларининг материалларини легаллаштириш. Бизнинг махсус хизматларимиз буни билади ва маъқул топса, телефондан фойдаланади», — деган у.
Путиннинг фикрича, «Берлин клиникасидаги бемор» Америка махсус хизматлари кўмагидан фойдаланади, Россия махсус хизмат ходимларига эса уни ўлдиришга ҳожат йўқ эди.
«У кимга керак ўзи? Агар (заҳарлашни) хоҳлаганимизда, иш охирига етказиларди», — деган Путин.
«Кенг оммада эътибор берилмайдиган, аммо муҳим бўлган бир нарса бор. Яъни ҳийла билан ҳукуматнинг биринчи одамларга ҳужум қилиш ва шу тариқа — буни амалга оширувчилар учун — маълум даражага кўтарилиб, ‘эътибор беринг, бу менинг шеригим’ дейиш. Ва шу орқали мен ҳам шу инсон даражасидаги одамман, менга ҳам шу кишига ўхшаб умуммиллий шахс сифатида қаранг, дейиш. Бу машҳур... сиёсий курашнинг ҳийла-найранглари бутун дунёда қўлланилади. Аммо, менинг фикримча, одамларнинг ҳурмат ва эътирофига эришиш учун бу усулдан фойдаланмаслик керак.
Ўз қурбингизни аниқ бир иш ёки муайян давлатда, айни ҳолатда бизнинг мамлакатимизда қўлланилиши мумкин бўлган аниқ бир дастур билан исботлашингиз лозим. Шунинг учун мен амалдаги ҳукуматга қарши бўлган барча мухолифларимизни, умуман, мамлакатдаги барча сиёсий кучларни ўзларининг шахсий амбициялари билан эмас, балки Россия фуқаролари манфаатларига таяниб, иш кўришга чақираман. Мамлакат олдида турган муаммоларни ижобий ҳал қилиш йўлини таклиф қилиш лозим. Муаммолар эса талайгина», — деган Россия президенти.
Эслатиб ўтамиз, 14 декабрь куни Навальнийнинг заҳарлангани бўйича The Insider, Bellingcat ва CNN’нинг Der Spiegel иштирокида ҳамкорликда ўтказилган текширув натижалари эълон қилинган, тергов муаллифлари сиёсатчига суиқасдни Томскда ФСБ криминалистика институти ниқоби остида ҳаракат қилган ФСБ махфий бўлимининг 8 нафар тезкор ходими томонидан амалга оширилган, деган хулосага келганди. Навальнийнинг ўзи бу иш президент Владимир Путиннинг буйруғи билан амалга оширилганига ишончи комиллигини айтган.
Россия ҳукумати Алексей Навальнийга қилинган суиқасдга алоқадорлигини аввалроқ бир неча бор рад этган, шунингдек, сиёсатчи заҳарланиши фактини шубҳа остига олган.
Изоҳ (0)