Испания полицияси Европол билан биргаликда 16 декабрь куни рус мафиясининг жиноий фаолиятдан олинган даромадларини «ювиш»да гумон қилиб, 23 кишини қўлга олди, деб ёзади Meduza Испания полициясига таяниб.
Улар орасида 8 нафар Россия фуқароси, икки украиналик, Қозоғистон ва Жазоирдан бир нафардан фуқаро ҳамда 11 нафар испаниялик бор.
Тергов версиясига кўра, жиноий гуруҳ аъзолари Испания иқтисодиётининг бош секторларини назорат қилмоқчи бўлиб, ҳуқуқшунослар, мансабдорлар, сиёсатчилар, бизнесменлар ва хакерлар ёрдамида давлат муассасаларига кириб олишга уринган.
Аликанте, Мадрид, Таррагона ва Ибицада ўтказилган тинтувларда полиция қурол-яроғ, 300 минг евро нақд пул, бриллиантлар, 16 та қимматбаҳо автомобиль ва криптовалюта ҳисобларини топган. Шунингдек, банк ҳисоблари ва миллионлаб евро қийматга эга активлар полиция томонидан хатланган.
Иш бўйича текширув 2013 йилда полиция Испанияда рус мафиясининг фаоллашиб қолганини сезганидан кейин бошланган. Текширув иштирокчилари фикрича, гумонланувчилар Испаниядан «Собиқ иттифоқ мамлакатларидаги жиноий ташкилотлар пулларини ‘ювиш’ учун таянч нуқта сифатида» фойдаланган.
Полиция гумонланувчиларнинг қўлга олинишини Испанияда сўнгги ўн йил ичида Шарқий Европа мафиясига қарши ўтказилган энг йирик операция деб атади.
2018 йил октябрида Испанияда Тамбов—Малишев ташкилий жиноятчилик гуруҳи аъзолари деб ҳисобланилган, асосан Россия фуқароларидан иборат 17 киши оқланган эди. Улар Испаниядаги компаниялар ва кўчмас мулклар орқали «пул ювиш»да айбланган эди. Испания миллий суд ҳайъати прокуратура судланувчилар ушбу ташкилий жиноятчилик гуруҳига алоқадор эканлиги ёки «пул ювиш» орқали унга ёрдам бергани юзасидан етарлича далил тақдим этилмаган деб ҳисоблади. Иш бўйича оқланганлар орасида Россия Давлат думаси депутати Владислав Резник ҳам бўлган.
Изоҳ (0)