Twitter ижтимоий тармоғи коронавирус инфекциясига қарши вакциналар ҳақидаги ишончсиз маълумотларни ўчиришни бошлайди, деб ёзади «РБК».
«Глобал пандемия шароитида вакциналар ҳақидаги дезинформация жиддий ва ўсиб бораётган муаммо ҳисобланади», — дейилади сервиснинг ўз блогига жойланган хабарида.
Компания аниқлик киритишича, коронавирусга қарши эмланиш одамга зарар келтириши ёки одамларни назорат қилиш учун фойдаланилиши ҳақидаги хабарлар, шунингдек, вакциналарнинг иккинчи даражали таъсирлари ҳақидаги ёлғон ёки рад этилган гаплардан иборат постлар ўчирилади.
Сервис маъмурияти қўшимча қилишича, 2021 йилдан текширилмаган маълумотлардан иборат барча хабарлар ёки вакцинация ҳақидаги миш-мишларга «баҳсли» деган белгича қўйилади.
Ижтимоий тармоқ коронавирус инфекциясига боғлиқ ишончсиз маълумотлар устидан 2020 йил майидан буён кузатув олиб бормоқда. Ўшанда сервис COVID-19’нинг тарқалиш усуллари ва хавфлилик даражалари ҳақидаги ёлғон хабарларни ўчириб, баҳсли маълумотларни белгилашни бошлаган эди.
Изоҳ (0)