Ўзбекистон ЙҲХББ фаралар бўйича «халқ манфаатларига хизмат қиладиган» таклифлар тайёрлаганини маълум қилди
Ўзбекистонда 1 январдан автомобилнинг кундузи чироқларини ёқиб юриши яна мажбурий бўлиши ҳақида хабар берилганди. Ички ишлар вазирлиги Йўл ҳаракати хавфсизлиги бош бошқармаси ҳолат юзасидан баёнот берди.
Қайд этилишича, «Йўл ҳаракати қоидалари»нинг 138-бандида куннинг ёруғ вақтида барча автомототранспорт воситалари яқинни ёритувчи чироқларини ёки кундузги сигнал чироқларини ёқиб ҳаракатланиши шартлиги белгиланган.
Шу билан бирга, Ўзбекистон Вазирлар Маҳкамасининг 2019 йил 4 июндаги «Йўл ҳаракати хавфсизлигини таъминлаш бўйича қўшимча чора-тадбирлар тўғрисида»ги 460-сонли қарори 2-бандида 2021 йил 1 январга қадар куннинг ёруғ вақтида яқинни ёритувчи чироқларни ёки кундузги сигнал чироқларни ёқиб ҳаракатланиши шартлиги бўйича талаб автоматик ёниб турувчи кундузги сигнал чироқлари билан жиҳозланмаган автомототранспорт воситаларига нисбатан татбиқ этилмаслиги кўрсатилган.
Ушбу масала юзасидан ИИВ Йўл ҳаракати хавфсизлиги бош бошқармасининг ўз фикр мулоҳазалари мавжуд бўлиб, тегишли таклифлар тайёрланган ва ушбу йўналишда чора-тадбирлар белгиланмоқда.
«Ўйлаймизки, белгиланаётган чора-тадбирлар халқ манфаатларига хизмат қилади», дейилади бошқарма баёнотида.
Эслатиб ўтамиз, Маъмурий жавобгарлик тўғрисидаги кодекснинг 128-моддасига кўра, ушбу ҳуқуқбузарлик биринчи марта содир этилганда 111 500 сўм, бир йил ичида такрор содир этилса 223 минг сўм, бир йил ичида 3 марта содир этилса, 669 минг сўм жарима солинади. 1 йил ичида 3 мартадан кўп содир этилганда ҳайдовчи 892 минг сўм жарима ёки транспорт воситасини бошқариш ҳуқуқидан 6 ойга маҳрум этиш билан жазоланади.
Расул Кушербаев ўз Telegram каналида бир гуруҳ депутатлар билан бу тартибни бекор қилиш бўйича Вазирлар Маҳкамаси ва Ички ишлар вазирлигига сўров киритганини маълум қилди. Улар куннинг ёруғ вақтида яқинни ёритувчи чироқларни ёки кундузги сигнал чироқларни ёқиб ҳаракатланиши шартлиги бўйича талабни автоматик ёниб турувчи кундузги сигнал чироқлари билан жиҳозланмаган автомототранспорт воситаларига нисбатан татбиқ этмасликни сўрамоқда.
