Ispaniya politsiyasi Yevropol bilan birgalikda 16-dekabr kuni rus mafiyasining jinoiy faoliyatdan olingan daromadlarini “yuvish”da gumon qilib, 23 kishini qo‘lga oldi, deb yozadi Meduza Ispaniya politsiyasiga tayanib.
Ular orasida 8 nafar Rossiya fuqarosi, ikki ukrainalik, Qozog‘iston va Jazoirdan bir nafardan fuqaro hamda 11 nafar ispaniyalik bor.
Tergov versiyasiga ko‘ra, jinoiy guruh a’zolari Ispaniya iqtisodiyotining bosh sektorlarini nazorat qilmoqchi bo‘lib, huquqshunoslar, mansabdorlar, siyosatchilar, biznesmenlar va xakerlar yordamida davlat muassasalariga kirib olishga uringan.
Alikante, Madrid, Tarragona va Ibitsada o‘tkazilgan tintuvlarda politsiya qurol-yarog‘, 300 ming yevro naqd pul, brilliantlar, 16 ta qimmatbaho avtomobil va kriptovalyuta hisoblarini topgan. Shuningdek, bank hisoblari va millionlab yevro qiymatga ega aktivlar politsiya tomonidan xatlangan.
Ish bo‘yicha tekshiruv 2013-yilda politsiya Ispaniyada rus mafiyasining faollashib qolganini sezganidan keyin boshlangan. Tekshiruv ishtirokchilari fikricha, gumonlanuvchilar Ispaniyadan “Sobiq ittifoq mamlakatlaridagi jinoiy tashkilotlar pullarini ‘yuvish’ uchun tayanch nuqta sifatida” foydalangan.
Politsiya gumonlanuvchilarning qo‘lga olinishini Ispaniyada so‘nggi o‘n yil ichida Sharqiy Yevropa mafiyasiga qarshi o‘tkazilgan eng yirik operatsiya deb atadi.
2018-yil oktabrida Ispaniyada Tambov—Malishev tashkiliy jinoyatchilik guruhi a’zolari deb hisoblanilgan, asosan Rossiya fuqarolaridan iborat 17 kishi oqlangan edi. Ular Ispaniyadagi kompaniyalar va ko‘chmas mulklar orqali “pul yuvish”da ayblangan edi. Ispaniya milliy sud hay’ati prokuratura sudlanuvchilar ushbu tashkiliy jinoyatchilik guruhiga aloqador ekanligi yoki “pul yuvish” orqali unga yordam bergani yuzasidan yetarlicha dalil taqdim etilmagan deb hisobladi. Ish bo‘yicha oqlanganlar orasida Rossiya Davlat dumasi deputati Vladislav Reznik ham bo‘lgan.
Izoh (0)