Дунё бўйича коронавирусга чалинганлар сони 74,1 миллион кишига етди, деб хабар беради «Коммерсантъ» Жонс Ҳопкинс университети маълумотларига таяниб. Сўнгги бир кеча-кундузда 625 мингта янги касалланиш ҳолати аниқланган. Пандемия бошидан буён 1,6 миллиондан ортиқ одам COVID-19 оқибатида вафот этган.
Коронавирусга чалиниш ҳолатлари бўйича АҚШ (16,9 миллион), Ҳиндистон (9,9 миллион), Бразилия (7 миллион) ва Россия (2,7 миллион) етакчи бўлиб қолмоқда. Касалланиш ҳолатлари дунёнинг жами 191 та мамлакатида қайд этилган.
Коронавирус оқибатида вафот этиш ҳолатлари энг кўп АҚШда (307 минг киши), Бразилияда (183 минг), Ҳиндистонда (144 минг) ва Мексикада (115 минг) кузатилган.
Кетма-кет 11 ҳафтадан буён рекорд сонли касалланишлар қайд этилмоқда. Жаҳон соғлиқни сақлаш ташкилоти (ЖССТ) мутахассислари фикрича, вирус тарқалишини тўхтатиш учун аҳолининг 60—70 фоизини эмлаш зарур. Шу билан бирга, ташкилот вакцинанинг ўзигина вирусни тўхтата олмаслигини таъкидлади.
Шунингдек, ЖССТ камбағал мамлакатлар 2024 йилгача коронавирусга қарши вакцинасиз қолиш хавфи мавжудлигини ҳам қайд этди. Бундан ташқари, ташкилот Рождество ва Янги йил байрамлари сабабли Европада 2021 йилнинг бошида коронавируснинг янги тўлқини юзага келиши эҳтимоли юқори эканлигидан огоҳлантирди.
Маълумот учун, дунёда коронавирусга чалинганлар сони 4 декабрь куни 65 миллион, 5 декабрь куни 66 миллион, 7 декабрь куни 67 миллион, 9 декабрь куни 68 миллион, 12 декабрь куни 70 миллион кишидан ошганди.
Изоҳ (0)