Коронавирус пандемияси билан боғлиқ вазият туфайли Россияда мигрантларнинг вақтинча бўлиш муддати 2021 йил 15 июнгача узайтирилди, деб хабар бермоқда «РИА Новости».
Қайд этилишича, бу борада Россия президенти Владимир Путиннинг тегишли фармони эълон қилинди.
«Россия Федерацияси президентининг 2020 йил 18 апрелдаги 274-сонли ‘Россия Федерациясидаги хорижий фуқаролар ва фуқаролиги бўлмаган шахсларнинг ҳуқуқий ҳолатини янги коронавирус инфекцияси кенг тарқалиши хавфи муносабати билан тартибга солиш бўйича вақтинчалик чора-тадбирлар тўғрисида’ги фармонига қуйидаги ўзгаришлар киритилсин: а) 1-банднинг биринчи хатбошидаги ‘2020 йил 15 декабргача’ деган сўзлар ‘2021 йил 15 июнга қадар’ деган сўзлар билан алмаштирилсин», — дея қайд этилган ҳужжатда.
Ҳужжатга мувофиқ, чет эл фуқаролари вақтинча яшаш тўғрисидаги ҳужжатларни янгилашлари шарт эмас. Фармон у имзоланган вақтдан бошлаб кучга киради.
Аввалроқ Россия мамлакатда нолегал бўлиб турган ўзбекистонликларга 15 декабргача имтиёз бергани ҳақида хабар берилганди.
Изоҳ (0)