Жиноят ишлари бўйича Фарғона вилоят судида 2020 йил 14 декабрь куни «Сўх воқеалари» юзасидан очилган жиноят иши бўйича навбатдаги суд мажлиси бўлиб ўтди, деб хабар берди «Дарё» мухбири.
Дастлаб ҳимоячи Бурҳон Мамажонов судланувчиларга нисбатан эҳтиёт чорасини ўзгартириш бўйича судга илтимоснома киритган. Адвокат Сўх туманидан олиб келинаётган 13 нафар шахснинг хулқ-атворидан келиб чиқиб уларга тайинланган эҳтиёт чорасини бекор қилишни таклиф қилган. Суд мазкур масала бўйича маслаҳатга кирган ва илтимосномани рад этган.
Судья Тожиддин Ваҳобов раислигида давом эттирилган суд ишида судланувчилар Баҳодир Шодиев, Ёдгор Жўраев, Шаҳзод Маҳмадалиев, Зайлобидин Зайлобов ва Шаҳромбек Олимовлар 31 май кун содир бўлган воқеа бўйича сўроқ қилинган.
Судланувчи Баҳодир Шодиев дастлабки терговда ўзига қўйилган айбловларни рад этган. У 31 май куни Чашма қишлоғига жанжалда иштирок этиш учун эмас, балки опасининг уйига борганини, опаси билан биргаликда касалхонада ётган акасини кўргани бормоқчи бўлганини, соат 14:30-15:00 ларда ўша ерга кетаётганда вилоят ҳокими иштирокида йиғилиш бўлаётганини кўрганини айтган. Ва ўша кунги воқеаларда умуман қатнашмаганлигини таъкидлаган.
«Кўчага чиқсам, ҳамма Чашма булоғи томонга кетяпти. Қирғизлар билан ўзбеклар ўртасида жанжал чиққанини эшитдим. Лекин мен жанжалда қатнашмаганман. Чашмадаги жанжалда иштирок этмаган бўлсам, нега бу ердаман? Ҳалигача тушуна олмаяпман», — деган судланувчи Баҳодир Шодиев.
Судланувчи Ёдгор Жўраев ўз кўрсатмасида жанжал содир бўлган куни далада бўлганини, онаси касал бўлиб шифохонага тушиб қолгани учун соат 18:00 ларда шифохонага борганини айтган. У ерда уни Чашмадаги жанжалда жароҳат олганлар ва уларнинг яқинлари кўрган. Ички ишлар ходимлари шифохонага келиб, тўпланганларни тарқатиб юборганини айтиб, жанжалда қатнашмаганини таъкидлаган.
«31 май куни далада эдим. Онамнинг қон босими ошиб кетиб касалхонага тушиб қолганди. Даладан келиб, касалхонага кетдим. Касалхонага борсам тез ёрдам машиналарида яраланганлар олиб келинаётган экан. У ерда одам жуда кўп эди. ИИБ ходимлари тўпланганларни тарқатишга уринарди. Касалхонада эрталаб соат 7:00 дан 7:30 гача бўлдим. Менга касалхонадаги тартибсизликларда қатнашганимни айтишяпти. Лекин мен унда қатнашмаганман», — деб кўрсатма берди судланувчи Ёдгор Жўраев.
Қайд этилишича, Ёдгор Жўраев дастлабки тергов органи сўроқнома баённомаларида ички ишлар ходимлари келган автобусга тош отгани, туман ИИБ биносига боргани, амакисининг ўғли тан жароҳати олиб, шифохонада ётгани каби ҳолатлар бўйича кўрсатмалар берган.
Шундан сўнг судланувчилар Шаҳзод Маҳмадалиэв, Зайлобидин Зайлобов ҳамда Шаҳромбек Олимовнинг 31 май куни Чашма булоғида юз берган воқеалар бўйича кўрсатувлари тингланган.
Судланувчиларнинг кўрсатмалари тинглангач, адвокатлар ва прокуратура ходимлари уларга саволлар билан мурожаат қилган.
Суд ишида 2020 йил 18 декабрга қадар танаффус эълон қилинди.
Эслатиб ўтамиз, вилоятнинг Сўх тумани Чашма қишлоғида қўшни давлат фуқаролари билан сув масаласидаги можарода иштирок этган 22 нафар шахсга нисбатан қўзғатилган жиноят ишини судда кўриб чиқиш жараёни 2020 йил 9 ноябрь куни бошланган эди. Шундан сўнг 23—30 ноябрь кунларига тайинланган суд мажлислари айрим сабабларга кўра, белгиланган вақтда ўтказилмади.
Жиноят иши доирасида 9 нафар шахсга нисбатан қамоққа олиш ва 13 нафар шахсга уй қамоғи эҳтиёт чораси қўлланилган. Судланувчилар орасида икки нафар вояга етмаган шахс ҳам бор. Судда вояга этмаган судланувчиларнинг қонуний вакиллари иштироки таъминланган.
Изоҳ (0)