Россияда COVID-19’га қарши эмлаш бошланди

Россиянинг барча ҳудудларида коронавирусга қарши эмлаш бошланди. Бу ҳақда соғлиқни сақлаш вазири Михаил Мурашко COVID-19 тарқалишига қарши кураш кенгаши мажлисида маълум қилди, деб ёзади «РИА Новости».

Унинг таъкидлашича, барча ҳудудлар вакцинани қабул қилишга тайёр, етказиб бериш, сақлаш ва эмлаш сифати параметрлари ҳамда беморлар ва тиббий ходимлар учун эслатмалар ишлаб чиқилган.

«Соғлиқни сақлаш вазирлиги дорини ҳудудларга етказиб бериш учун тақсимлаш бўйича келаси уч ойга мўлжалланган режа тузди», — деди бош вазир Михаил Мишустин.

Унинг аниқлик киритишича, вакцина ишлаб чиқарувчилар ҳар ҳафта Соғлиқни сақлаш вазирлигига топширилган дорилар ҳақида ахборот узатиши керак бўлади, вазирлик эса икки кун ичида вакцинани эҳтиёжга қараб ҳудудлар бўйича тақсимлайди.

Россияда коронавирусга қарши кенг кўламли эмлаш ишларини бошлаш ҳақида президент Владимир Путин декабрь бошида буйруқ берган, биринчи навбатда хавф гуруҳидаги фуқаролар эмланиши кераклигини айтган эди.

Россияда иккита вакцина рўйхатдан ўтказилган: Гамалея маркази томонидан ишлаб чиқилган «Спутник V» ва Новосибирскнинг «Вектор» маркази томонидан яратилган «ЭпиВакКорона». Ҳар иккала препарат учинчи синов босқичида ва у ҳали давом этмоқда. «Спутник V» ишлаб чиқарувчилар унинг 95 фоиз самадорлигини маълум қилган.

Эслатиб ўтамиз, АҚШда 14 декабрь куни коронавирусга қарши эмлаш бошланди. Касалликлар назорати ва профилактикаси марказлари (CDC) маълумотларига кўра, 2020 йил охиригача Америка ҳукумати 40 миллион кишини эмлашни режалаштирмоқда.

2 декабрь куни Буюк Британия дунёда биринчи бўлиб Pfizer’нинг коронавирусга қарши вакцинасидан фойдаланишни маъқуллаган эди. Шундан кейин Британия дунёда биринчи бўлиб коронавирусга қарши вакцинацияни бошлаши хабар берилди. 4 декабрь куни эса Баҳрайн ҳам Pfizer вакцинасидан фойдаланишни маъқуллади. Шунингдек, Pfizer ва BioNTech вакцинаси АҚШда ҳамда Мексикада ҳам маъқулланди.