АҚШ Сенатида республикачилардан иборат кўпчилик етакчиси Митч Макконнелл ўзига партиядош бўлган сенаторларни конгресс президент сайлови якунларини тасдиқлаш учун йиғилганида, натижалар юзасидан баҳслашмасликка чақирган. Бу ҳақда Hill нашри телефон орқали ўтказилган мажлисда қатнашган сенаторларга таяниб хабар берди, деб ёзади «РБК».
Макконнелл таъкидлашича, сайловчилар ҳайъати аъзоларининг овозларини тасдиқлаш чоғида эътироз билдириш мунозаралар ва овоз беришлар ўтказиш заруриятини келтириб чиқаради, бу эса республикачиларнинг обрўсини туширади. Унинг сўзларига кўра, бундай вазият «ҳеч бир тарафнинг манфаатларига мувофиқ келмайди».
Айни пайтда Республикачилар партиясидан бўлган Конгресс вакиллар палатаси аъзоси Мо Брукс ўз партиядошларини сайловчилар ҳайъатининг демократ Жо Байден ғолиб чиқишига сабаб бўлган овоз бериш якунлари юзасидан эътироз билдиришга чақирди.
АҚШ президенти сайловлари 3 ноябрь куни бўлиб ўтди. 14 декабрь куни (Тошкент вақти билан 15 декабрь) сайловчилар ҳайъати кўпчилик овоз билан демократ Жо Байденни АҚШ президенти сайловларининг ғолиби дея тасдиқлади. Байденга 306 сайловчи, унинг рақиби, амалдаги АҚШ президенти Дональд Трампга 232 сайловчи овоз берди. Ғалаба учун 270 та овоз тўплаш керак — Байден ушбу маррадан сайловчиларнинг Калифорниядаги мажлисидан кейин ўтган эди. Овоз беришда 50 та штат ва Колумбия округидан жами 538 сайловчи қатнашди.
23 декабргача сайловчилар ҳайъати овозларидан иборат бюллетенлар Вашингтонга етказилади. 2021 йил 6 январь куни овозлар АҚШ Конгресси Вакиллар палатаси ва Сенатнинг қўшма мажлисида ҳисоблаб чиқилади. 20 январь куни сайланган президентнинг инаугурацияси бўлиб ўтади.
Изоҳ (0)