KXDR hukumati Rossiyaning koronavirusga qarshi “Sputnik V” vaksinasi hamda Xitoyning diagnostika uskunlarini sotib oldi. Bu haqda Yaponiyaning Asahi Shimbun gazetasi Janubiy Koreya razvedkasi va Xitoy biznes doiralariga tayanib xabar berdi.

Foto: RT

Shartnoma qiymati va vaksina partiyasining hajmi noma’lum. Vaksinatsiya Shimoliy Koreya Mehnat partiyasining vakillari orasida saralash yo‘li bilan amalga oshiriladi. Mamlakat rahbari Kim Chen Inning emlanishi to‘g‘risida aniq ma’lumotlar yo‘q.

KXDR Xitoydan sotib olgan tibbiyot uskunalari orasida termograflar ham borligi aytilmoqda. Ular ikki mamlakat o‘rtasidagi iqtisodiy munosabatlarni qayta tiklash uchun KXDR va Xitoy chegarasiga o‘rnatilgan.

Rossiya to‘g‘ridan to‘g‘ri investitsiyalar fondining ma’lum qilishicha, KXDRning “Sputnik V” vaksinasini sotib olgani to‘g‘risidagi xabarlar haqiqatga mos kelmaydi.

Avvalroq Shimoliy Koreyada kamida ikki nafar amaldor COVID-19 koronavirus pandemiyasi sabab yuzaga kelgan iqtisodiy tanglik tufayli qatl qilingani, shuningdek, mamlakatda karantin qoidalarini buzgan erkak omma oldida otib o‘ldirilgani haqida xabar berilgandi.

Eslatib o‘tamiz, birinchi oraliq tahlil natijalari vaksina 92 foiz samaradorligini ko‘rsatgan. Keyinroq “Sputnik V” ishlab chiquvchilari 39 ta bemor haqidagi dastlabki ma’lumotlarga asoslanib, o‘z vaksinasi samaradorligini 95 foizga baholagan. Dekabr oyining boshida Rossiyada COVID-19’ga qarshi ommaviy emlash boshlangani ma’lum qilindi. Moskvada 5-dekabrdan emlash ma’lum toifadagi aholi vakillari uchun boshlandi. Vaksinatsiya uchun “Sputnik V” vaksinasidan foydalanilmoqda.