Президент администрацияси ҳузуридаги Ахборот ва оммавий коммуникациялар агентлиги Вазирлар Маҳкамасининг давлат органлари фаолиятини ёритишда ижтимоий тармоқлар ва оммавий ахборот воситаларидан фойдаланишни такомиллаштириш тўғрисидаги қарори лойиҳасини муҳокамага тақдим этди.
Ҳужжатда таъкидланишича, давлат идоралари матбуот хизматларини бевосита биринчи раҳбарга бўйсунадиган мустақил бўлимларга айлантириш режалаштирилган.
2021 йил 1 февралдан бошлаб:
- давлат идоралари фаолиятини доимий ёритиб бориш ҳамда амалга оширилаётган лойиҳаларни жамоатчиликка тезкор ва тушунарли етказиб бериш орқали ташкилотнинг ижобий имижини шакллантиришга доир вазифаларни амалга ошириш жараёнида ҳамкорликда ишловчи журналист ва фойдаланувчилар сони юқори бўлган блогерлардан иборат «Медиа пул» ташкил этилади;
- журналистларнинг аккредитация қилиш тўғрисидаги ёзма ва электрон мурожаатлари давлат идоралари томонидан тегишли мурожаат олинган кундан бошлаб кўпи билан уч иш кунида кўриб чиқилиши белгиланади;
- давлат идоралари ўзларининг жамоатчилик кенгашлари фаолияти ва аъзолар рўйхатини қайта кўриб чиқади ва жамоатчилик кенгашлари таркибига камида бир нафардан фаол журналист ва/ёки блогерни киритиш чоралари кўрилади;
- Ўзбекистон Президенти Администрацияси ҳузуридаги Ахборот ва оммавий коммуникациялар агентлиги (кейинги ўринларда — aгентлик) томонидан оммавий ахборот воситалари, ижтимоий тармоқлар ва мобил мессенжерларнинг мониторинги натижасида аниқланган давлат идоралари фаолиятига тааллуқли, аҳолининг кенг қатлами онгига салбий таъсир кўрсатувчи материал ва маълумотларга давлат идораларининг тезкор муносабат билдириш муддати бир кун қилиб белгиланади;
- давлат идоралари ҳар чоракда камида бир марта оммавий ахборот воситалари ва блогерлар учун очиқ бўлган матбуот конференциялари, брифинглар ташкил этиш ва интервьюлар, савол-жавоблар ўтказиш йўли билан жамоатчиликка доимий ҳисобот бериб борилади;
- давлат идораларининг турли даражадаги раҳбарлари Facebook, Twitter, Instagram, Telegram каби кўплаб фойдаланувчиларга эга ижтимоий тармоқлар, мессенжерларда ўз расмий саҳифаларини очади ва уларни белгиланган тартибда верификация қилиш чораларини кўради;
- давлат идораларининг биринчи даражали раҳбарлари ахборот хизматлари билан биргаликда интернет тармоғидаги Wikipedia мустақил интернет-энциклопедиясида алоҳида веб-саҳифа очиб, ўзи бошқараётган давлат идораси ва ўзининг меҳнат фаолияти тўғрисидаги маълумотларни ўзбек, рус, инглиз тилларида жойлаштиради;
- давлат идоралари 2021 йил якунига қадар ўзларининг очиқ маълумотлари ва янгиликларини мобил қурилмалар орқали қулай, тезкор равишда олиш имкониятини тақдим этувчи Android ва iOS операцион тизимларида ишловчи мобил иловаларни ишга туширади ҳамда мазкур иловалардаги ахборот, маълумотлар базасини Ўзбекистон Давлат статистика қўмитаси билан ҳамкорликда Ўзбекистоннинг очиқ маълумотлар портали (opendata.gov.uz) билан интеграция қилиш чораларини кўради;
- давлат идораларининг раҳбар ходимлари ўз расмий саҳифаларида ҳафта давомида камида уч марта бошқарувидаги давлат идораси фаолиятига дахлдор бўлган ахборотни жойлаштириб боради ҳамда мазкур саҳифалар орқали жамоатчилик фикрини ўрганиб, мурожаат ва саволларга жавоб бериб борилишини ташкил этади;
- давлат идоралари ахборот хизматлари, таркибий тузилмалар мунтазам равишда ўз раҳбарларини ташкилот фаолияти билан боғлиқ бўлган ахборот материаллари билан таъминласин ҳамда раҳбар ходимларнинг расмий саҳифаларидаги ахборотларини ижтимоий тармоқлар, мессенжерлар ва оммавий ахборот воситалари орқали кенг миқёсда тарқатилишини амалга оширади.
- икки ой муддатда давлат идораларининг оммавий ахборот воситалари ва ижтимоий тармоқларда эълон қилинаётган тегишли танқидий-таҳлилий материалларга ўз вақтида муносабат билдириб бориш, шунингдек медиа-режаларни тайёрлаш ва уларнинг ижроси бажарилиши ҳисобини юритиш имкониятига эга бўлган махсус ахборот таҳлилий электрон тизимни ишга туширсин ҳамда матбуот котибларига мазкур тизимдан фойдаланишни ўргатиш мақсадида қисқа муддатли семинарларни ташкиллаштиради;
- давлат идораларининг ижтимоий тармоқлар ва оммавий ахборот воситалари билан ишлаш натижалари бўйича мунтазам мониторинг олиб борсин ва мониторинг якунлари асосида рейтинг тизимида баҳолаш ишларини ташкил этади;
- ҳар олти ойда рейтинг натижаларига кўра шакллантирилган таҳлилий маълумотлар асосида паст кўрсаткич қайд этган масъуллар ҳамда матбуот котибларининг очиқлик йўналишидаги фаолиятини танқидий кўриб чиқиш, шунингдек уларга нисбатан меҳнат қонунчилигига мувофиқ жавобгарлик белгилаш бўйича тегишли чора кўриш учун Ўзбекистон Вазирлар Маҳкамасига таклифлар киритиб боради.
Шу билан бирга, у ижтимоий тармоқ фойдаланувчилари билан онлайн мулоқот маданияти, савол-жавоб суҳбати ўтказиш ва пресс-турлар ва бошқа тадбирларни ташкил этиш талабларини ўз ичига олади. Ҳудудларда «Ёш журналистлар ва блогерлар клублари» пайдо бўлиши мумкин, уларнинг ташкил этилиши учун жавобгарлик Ёшлар ишлари бўйича агентлик, Ёшлар иттифоқи ва Ўзбекистон журналистика ва оммавий коммуникациялар университети томонидан белгиланади.
Лойиҳа муҳокамаси 2020 йилнинг 29 декабригача давом этади.
Мавзуга доир:
Изоҳ (0)