Prezident administratsiyasi huzuridagi Axborot va ommaviy kommunikatsiyalar agentligi Vazirlar Mahkamasining davlat organlari faoliyatini yoritishda ijtimoiy tarmoqlar va ommaviy axborot vositalaridan foydalanishni takomillashtirish to‘g‘risidagi qarori loyihasini muhokamaga taqdim etdi.
Hujjatda ta’kidlanishicha, davlat idoralari matbuot xizmatlarini bevosita birinchi rahbarga bo‘ysunadigan mustaqil bo‘limlarga aylantirish rejalashtirilgan.
2021-yil 1-fevraldan boshlab:
- davlat idoralari faoliyatini doimiy yoritib borish hamda amalga oshirilayotgan loyihalarni jamoatchilikka tezkor va tushunarli yetkazib berish orqali tashkilotning ijobiy imijini shakllantirishga doir vazifalarni amalga oshirish jarayonida hamkorlikda ishlovchi jurnalist va foydalanuvchilar soni yuqori bo‘lgan blogerlardan iborat “Media pul” tashkil etiladi;
- jurnalistlarning akkreditatsiya qilish to‘g‘risidagi yozma va elektron murojaatlari davlat idoralari tomonidan tegishli murojaat olingan kundan boshlab ko‘pi bilan uch ish kunida ko‘rib chiqilishi belgilanadi;
- davlat idoralari o‘zlarining jamoatchilik kengashlari faoliyati va a’zolar ro‘yxatini qayta ko‘rib chiqadi va jamoatchilik kengashlari tarkibiga kamida bir nafardan faol jurnalist va/yoki blogerni kiritish choralari ko‘riladi;
- O‘zbekiston Prezidenti Administratsiyasi huzuridagi Axborot va ommaviy kommunikatsiyalar agentligi (keyingi o‘rinlarda — agentlik) tomonidan ommaviy axborot vositalari, ijtimoiy tarmoqlar va mobil messenjerlarning monitoringi natijasida aniqlangan davlat idoralari faoliyatiga taalluqli, aholining keng qatlami ongiga salbiy ta’sir ko‘rsatuvchi material va ma’lumotlarga davlat idoralarining tezkor munosabat bildirish muddati bir kun qilib belgilanadi;
- davlat idoralari har chorakda kamida bir marta ommaviy axborot vositalari va blogerlar uchun ochiq bo‘lgan matbuot konferensiyalari, brifinglar tashkil etish va intervyular, savol-javoblar o‘tkazish yo‘li bilan jamoatchilikka doimiy hisobot berib boriladi;
- davlat idoralarining turli darajadagi rahbarlari Facebook, Twitter, Instagram, Telegram kabi ko‘plab foydalanuvchilarga ega ijtimoiy tarmoqlar, messenjerlarda o‘z rasmiy sahifalarini ochadi va ularni belgilangan tartibda verifikatsiya qilish choralarini ko‘radi;
- davlat idoralarining birinchi darajali rahbarlari axborot xizmatlari bilan birgalikda internet tarmog‘idagi Wikipedia mustaqil internet-ensiklopediyasida alohida veb-sahifa ochib, o‘zi boshqarayotgan davlat idorasi va o‘zining mehnat faoliyati to‘g‘risidagi ma’lumotlarni o‘zbek, rus, ingliz tillarida joylashtiradi;
- davlat idoralari 2021-yil yakuniga qadar o‘zlarining ochiq ma’lumotlari va yangiliklarini mobil qurilmalar orqali qulay, tezkor ravishda olish imkoniyatini taqdim etuvchi Android va iOS operatsion tizimlarida ishlovchi mobil ilovalarni ishga tushiradi hamda mazkur ilovalardagi axborot, ma’lumotlar bazasini O‘zbekiston Davlat statistika qo‘mitasi bilan hamkorlikda O‘zbekistonning ochiq ma’lumotlar portali (opendata.gov.uz) bilan integratsiya qilish choralarini ko‘radi;
- davlat idoralarining rahbar xodimlari o‘z rasmiy sahifalarida hafta davomida kamida uch marta boshqaruvidagi davlat idorasi faoliyatiga daxldor bo‘lgan axborotni joylashtirib boradi hamda mazkur sahifalar orqali jamoatchilik fikrini o‘rganib, murojaat va savollarga javob berib borilishini tashkil etadi;
- davlat idoralari axborot xizmatlari, tarkibiy tuzilmalar muntazam ravishda o‘z rahbarlarini tashkilot faoliyati bilan bog‘liq bo‘lgan axborot materiallari bilan ta’minlasin hamda rahbar xodimlarning rasmiy sahifalaridagi axborotlarini ijtimoiy tarmoqlar, messenjerlar va ommaviy axborot vositalari orqali keng miqyosda tarqatilishini amalga oshiradi.
- ikki oy muddatda davlat idoralarining ommaviy axborot vositalari va ijtimoiy tarmoqlarda e’lon qilinayotgan tegishli tanqidiy-tahliliy materiallarga o‘z vaqtida munosabat bildirib borish, shuningdek media-rejalarni tayyorlash va ularning ijrosi bajarilishi hisobini yuritish imkoniyatiga ega bo‘lgan maxsus axborot tahliliy elektron tizimni ishga tushirsin hamda matbuot kotiblariga mazkur tizimdan foydalanishni o‘rgatish maqsadida qisqa muddatli seminarlarni tashkillashtiradi;
- davlat idoralarining ijtimoiy tarmoqlar va ommaviy axborot vositalari bilan ishlash natijalari bo‘yicha muntazam monitoring olib borsin va monitoring yakunlari asosida reyting tizimida baholash ishlarini tashkil etadi;
- har olti oyda reyting natijalariga ko‘ra shakllantirilgan tahliliy ma’lumotlar asosida past ko‘rsatkich qayd etgan mas’ullar hamda matbuot kotiblarining ochiqlik yo‘nalishidagi faoliyatini tanqidiy ko‘rib chiqish, shuningdek ularga nisbatan mehnat qonunchiligiga muvofiq javobgarlik belgilash bo‘yicha tegishli chora ko‘rish uchun O‘zbekiston Vazirlar Mahkamasiga takliflar kiritib boradi.
Shu bilan birga, u ijtimoiy tarmoq foydalanuvchilari bilan onlayn muloqot madaniyati, savol-javob suhbati o‘tkazish va press-turlar va boshqa tadbirlarni tashkil etish talablarini o‘z ichiga oladi. Hududlarda “Yosh jurnalistlar va blogerlar klublari” paydo bo‘lishi mumkin, ularning tashkil etilishi uchun javobgarlik Yoshlar ishlari bo‘yicha agentlik, Yoshlar ittifoqi va O‘zbekiston jurnalistika va ommaviy kommunikatsiyalar universiteti tomonidan belgilanadi.
Loyiha muhokamasi 2020-yilning 29-dekabrigacha davom etadi.
Mavzuga doir:
Izoh (0)