Россияда коронавирус пандемияси шароитида ўлим даражаси сўнгги 10 йил ичида энг юқори даражага етди. Meduza’нинг хабар беришича, бу ҳақда «Росстат» маълумотларига таяниб «РБК» томонидан ўтказилган ҳисоб-китоблар гувоҳлик бермоқда.
2020 йил январь—октябрь ойларида ўлим даражаси аҳолининг 10 минг нафарига 113,2 кишини ташкил этди. Бу 2010 йилдан буён энг юқори кўрсаткич бўлиб, ўша вақтда ҳар 10 минг кишига 119,3 та ўлим тўғри келган, ўлимлар сони Россияда ёз фаслининг аномал иссиқ бўлгани сабабли ошганди.
«Росстат» маълумотларига кўра, 2020 йил январь—октябрь ойларида ўлганларнинг умумий сони 1,661 миллион кишига етди. Бунгача охирги марта юқори ўлим даражаси 2010 йилнинг январь—октябрь ойларида юқори бўлган ва 1,704 миллион кишини ташкил этган.
«РБК» ҳам 2020 йил апрель—октябрь ойларида ортиқча ўлим ҳолатларини ҳисоблаб чиққан. Нашр маълумотларига кўра, бу 140,2 минг кишини ташкил этган. Шу даврда COVID-19’дан вафот этганларнинг умумий сони «Росстат» томонидан 78,6 минг нафар деб қайд этилган. Қолган йўқотишлар коронавирусдан ўлимни ҳисобга олмаслик, пандемиянинг билвосита таъсири, хусусан, соғлиқни сақлаш тизимидаги юкламалар ортгани билан ҳам боғлиқ бўлиши мумкин.
Аввалроқ Россияда октябрь ойидаги вафот этганлар сони 2019 йилги кўрсаткичдан 30 фоизга кўп бўлгани, пандемия бошидан буён ортиқча ўлим ҳолатлари 138 мингтадан ошгани ҳақида хабар берилган эди.
Изоҳ (0)