Бразилия президенти Жаир Болсонару COVID-19’га қарши эмланмаслигини маълум қилди. Бу ҳақда у Банд телеканалига берган интервьюсида айтиб ўтди, деб ёзади «Gazeta.ru».
Президент вакцинани фақат эмланишни истаганлар олиши керак, деб ҳисоблайди.
«Мен эмланмайман, тамом. Ҳаётим хавф остидами? Бу менинг муаммом», – деди Болсонару.
65 ёшли Болсонару бир неча бор COVID-19 пандемиясининг ҳақиқати тўғрисида шубҳада эканини маълум қилган. Баъзи жойларда ижтимоий масофа қоидасини бузган. Ёзда у коронавирус билан касалланди ва даволаниб чиқди.
Шунингдек, у коронавирусдан ҳимоя қилиш воситаси сифатида ниқоб кийиш самарасиз, деб ҳисоблаган. Кейинчалик суд Бразилия президентига ниқоб кийишни буюрди. Унга кўра, Болсонару оммавий тадбирларда қатнашаётганда ҳимоя воситаларини кийиши керак.
Маълумот учун, Бразилия коронавирус билан касалланганлар сони (6 970 034) бўйича АҚШ (16 725 039) ва Ҳиндистондан (9 932 547) кейин учинчи ўринда туради.
Аввалроқ Бразилия «жиддий ҳодиса» сабабли Хитойда яратилган коронавирусга қарши вакцина синовини тўхтатгани ҳақида хабар берилганди.
Изоҳ (0)