Жанубий Корея Шимолий Кореяда тарғибот варақаларини тарқатишни тақиқлади, деб хабар бермоқда Reuters.
Жанубий Корея парламенти КХДР билан чегарадош ҳудудларда ташвиқот варақалари, товарлар, пуллар ва бошқа қимматбаҳо буюмлар бўлган ҳаво шарларини учиришни тақиқловчи қонун лойиҳасини маъқуллади. Шунингдек, муқаддам жануб томон ҳарбийлари шимолга қарши психологик урушнинг бир қисми сифатида ўтказган овоз кучайтиргичлар орқали тарғибот эшиттирувларига ҳам чеклов қўяди.
Қонун лойиҳасига 187 депутатнинг барчаси овоз берган. Ҳужжат, жараённи кечиктириш орқали унинг қабул қилинишига қарши чиқишга уринган мухолифат партиясининг норозиликларига қарамай тасдиқланган. Фуқароларга чегаралар орқали варақалар учириб тарқатишни расман тақиқловчи қонун парламент томонидан биринчи марта қабул қилиниши. Жанубий Корея илгари бундай фаолиятни фақат жуда қалтис пайтларда тақиқлаган.
Тақиқ уч ойдан сўнг кучга киради ва уни бузганлар 3 йилгача озодликдан маҳрум қилиш ёки 27 400 доллар миқдорида жарима тўлаш билан жазоланади.
Варақа тарқатиш учун лицензиясидан маҳрум қилинган Парк Санг-Хак ва унинг «Эркин Шимолий Корея учун курашчилар» ташкилоти 15 йиллик кампанияларидан воз кечмаслигини билдирган. «Мен ҳақиқатни айтиш учун варақалар юборишда давом этаман, чунки Шимолий кореяликлар ҳақиқатни билиш ҳуқуқига эга. Мен қамоқдан қўрқмайман», — деган у.
Пак ва Жанубий Кореядаги бошқа 20 та ҳуқуқни ҳимоя қилувчи ташкилотлар қонуннинг конститусияга мувофиқлигини баҳолашишга ваъда берган. Human Right Watch халқаро ташкилоти эса бундай тақиқни мамлакатнинг хато стратегияси деб баҳолаган.
АҚШ Конгрессмен-республикачи, Инсон ҳуқуқлари бўйича икки партияли комиссиянинг ҳамраиси Крис Смит баёнот билан чиқиб, шунчаки маълумот алмашиш қамоққа олинишга сабаб бўлувчи тузатишни нотўғри деб топди ва уни «ўйланмаган ва қўрқинчли» деб танқид қилди.
Шимолий Кореянинг Жанубий Корея билан алоқалар бўйича идораси Смитнинг баёноти ҳақидаги саволга жавобан қонун лойиҳаси чегара ҳудудларидаги аҳолиси ҳаёти ва хавфсизлигини ҳимоя қилишдаги минимал уриниш эканлигини билдирган.
Шимолий кореялик фаоллар ва қочқинлар гелий билан тўлдирилган улкан шарлар орқали КХДР раҳбари Ким Чен Ин режимини танқид қилган варақалар, Жанубий Кореядаги жамият ва иқтисодиёт тарихи ҳақидаги рисолалар, доллар купюралари ва дунё янгиликлари ёзилган USB-флешкаларни кўп йиллардан буён жўнатиб келган. Сўнгги марта Жанубий Корея бундай варақаларни шу йилнинг ёзида жўнатганди.
Изоҳ (0)