Россия Қурилиш вазирлиги меҳнат муҳожирларининг мамлакатга киришини соддалаштириш таклифи билан чиқди

Россия қурилиш вазирлиги ва коммунал хизматлар бошқармаси мигрантларнинг қурилиш ишларига келишлари учун мамлакатга кириш шартларини соддалаштиришни сўради ва бир қатор таклифлар берди. Бу ҳақда вазирлик матбуот хизматига таяниб, «ТАСС» хабар берди.

Таъкидланишича, Ички ишлар вазирлиги, Меҳнат вазирлиги ва «Роспетробнадзор» билан келишилган ушбу таклифлар Россия ҳукуматига кўриб чиқиш учун юборилган.

Вазирлик қурилиш майдонларида ишчи кучи етишмаслигининг асосий сабаби сифатида чет эллик ишчиларнинг Россияга киришига тақиқ қўйилганини келтиради. Шунингдек, баҳорда тўхтатилган қурилиш майдонларида меҳнат муҳожирларининг ишлаб чиқариш соҳасига ўтиши таъсир кўрсатган.

Шу сабабли Россия Қурилиш вазирлиги ишчи кучининг етишмаслигини меҳнат муҳожирларини олиб кириш, жойлаштириш ва рўйхатга олишни ташкиллаштириш орқали ечиш ниятида. Таклиф этувчи ташкилотлар мамлакатга келган муҳожирларда коронавирус йўқлигини тасдиқловчи маълумотнома бўлишини таъминлашга мажбур бўлади.

Россия ҳукуматининг ҳисоблашича, пандемия сабаб мамлакат меҳнат бозори 1,5 миллион ишчидан айрилган. Шу билан бирга, Россия фуқаролари ишсизлик ва маошлар ортганига қарамай, қурилиш ишларига боришни хоҳламаяпти.

Хорижлик фуқаролардан Россияга киришдан камида 3 кун олдин коронавирусга топширган тестининг салбий жавобини тақдим этишларини сўраш таклиф этиляпти. Ишчи кучини жалб этган ташкилотлар хориж фуқароларини миграция рўйхатига қўйиши ва у билан меҳнат шартномасини имзолаши керак бўлади. Муҳожирларга меҳнат фаолияти учун патентларни Москвада рўйхатдан ўтказиш керак бўлади.

Мамлакат Қурилиш вазирлиги 1 декабрь ҳолатига кўра мамлакатнинг 77 вилоятидан 50 тасидаги қурилиш майдонларида муҳожирлар етишмовчилиги кузатилаётганини айтган. «Работа в России» сайтининг хабар беришича, қурилиш соҳасида ишчи кучига бўлган талаб 190 мингдан ортиқ одамни ташкил қилади. «Ҳозирда қурилиш майдонларида Ўзбекистон, Украина ва Тожикистондан келган муҳожирлар етишмаяпти», — дейилади хабарда.

Аввалроқ Россия Савдо-саноат палатаси меҳнат мигрантларининг оиласи билан мамлакатга келишига рухсат берилишини сўраб чиққанди.