Janubiy Koreya Shimoliy Koreyada targ‘ibot varaqalarini tarqatishni taqiqladi, deb xabar bermoqda Reuters.
Janubiy Koreya parlamenti KXDR bilan chegaradosh hududlarda tashviqot varaqalari, tovarlar, pullar va boshqa qimmatbaho buyumlar bo‘lgan havo sharlarini uchirishni taqiqlovchi qonun loyihasini ma’qulladi. Shuningdek, muqaddam janub tomon harbiylari shimolga qarshi psixologik urushning bir qismi sifatida o‘tkazgan ovoz kuchaytirgichlar orqali targ‘ibot eshittiruvlariga ham cheklov qo‘yadi.
Qonun loyihasiga 187 deputatning barchasi ovoz bergan. Hujjat, jarayonni kechiktirish orqali uning qabul qilinishiga qarshi chiqishga uringan muxolifat partiyasining noroziliklariga qaramay tasdiqlangan. Fuqarolarga chegaralar orqali varaqalar uchirib tarqatishni rasman taqiqlovchi qonun parlament tomonidan birinchi marta qabul qilinishi. Janubiy Koreya ilgari bunday faoliyatni faqat juda qaltis paytlarda taqiqlagan.
Taqiq uch oydan so‘ng kuchga kiradi va uni buzganlar 3 yilgacha ozodlikdan mahrum qilish yoki 27 400 dollar miqdorida jarima to‘lash bilan jazolanadi.
Varaqa tarqatish uchun litsenziyasidan mahrum qilingan Park Sang-Xak va uning “Erkin Shimoliy Koreya uchun kurashchilar” tashkiloti 15 yillik kampaniyalaridan voz kechmasligini bildirgan. “Men haqiqatni aytish uchun varaqalar yuborishda davom etaman, chunki Shimoliy koreyaliklar haqiqatni bilish huquqiga ega. Men qamoqdan qo‘rqmayman”, — degan u.
Pak va Janubiy Koreyadagi boshqa 20 ta huquqni himoya qiluvchi tashkilotlar qonunning konstitusiyaga muvofiqligini baholashishga va’da bergan. Human Rights Watch xalqaro tashkiloti esa bunday taqiqni mamlakatning xato strategiyasi deb baholagan.
AQSh Kongressmen-respublikachi, Inson huquqlari bo‘yicha ikki partiyali komissiyaning hamraisi Kris Smit bayonot bilan chiqib, shunchaki ma’lumot almashish qamoqqa olinishga sabab bo‘luvchi tuzatishni noto‘g‘ri deb topdi va uni “o‘ylanmagan va qo‘rqinchli” deb tanqid qildi.
Shimoliy Koreyaning Janubiy Koreya bilan aloqalar bo‘yicha idorasi Smitning bayonoti haqidagi savolga javoban qonun loyihasi chegara hududlaridagi aholisi hayoti va xavfsizligini himoya qilishdagi minimal urinish ekanligini bildirgan.
Shimoliy koreyalik faollar va qochqinlar geliy bilan to‘ldirilgan ulkan sharlar orqali KXDR rahbari Kim Chen In rejimini tanqid qilgan varaqalar, Janubiy Koreyadagi jamiyat va iqtisodiyot tarixi haqidagi risolalar, dollar kupyuralari va dunyo yangiliklari yozilgan USB-fleshkalarni ko‘p yillardan buyon jo‘natib kelgan. So‘nggi marta Janubiy Koreya bunday varaqalarni shu yilning yozida jo‘natgandi.
Izoh (0)