Чеченистон раҳбари Рамзан Қодировнинг 20 ёшли қизи Хадижат Қодирова Грознийда мактабгача таълим бошқармаси бошлиғи бўлди. Meduza’нинг хабар беришича, бу ҳақда Мактабгача таълим бўйича республика ҳукумат қўмитаси раиси Асланбек Жунаидов ўзининг Instagram’даги саҳифасида эълон қилди.
«Ушбу тайинлов, шубҳасиз, республика раҳбарияти томонидан билдирилган ишонч, раҳбарнинг бошқарув қобилияти ва ишбилармонлик фазилатларининг тан олганидан далолат беради», — деб ёзган Жунаидов.
Тайинловга қадар Хадижат Қодирова Грознийдаги «Мўъжизавий қаср» («Сказочний замок») болалар боғчаси мудири бўлиб ишлаган.
2020 йилнинг сентябрида Қодиров ўзининг 21 ёшли қизи Айшатни республика маданият вазирининг биринчи ўринбосари этиб тайинлаганди.
2020 йилнинг ёзида Рамзан Қодировнинг Аргун шаҳри мери лавозимида ишлаган қариндоши Хас-Магомед Қодиров Чеченистон Хавфсизлик кенгашининг котиби бўлди. Йил бошида Қодировнинг жиянлари республиканинг спорт вазири, президент администрацияси бошлиғи ва ҳукумат раҳбари этиб, унинг амакиваччаси эса таълим вазири этиб тайинланган.
Қодировнинг қариндошлари Чеченистон раҳбариятида юқори лавозимларни эгаллаб келади. 2018 йилда «BBC Россия хизмати» мамлакатдаги энг нуфузли 150 нафар амалдорнинг 30 фоизи Чеченистон раҳбарининг қариндошлари эканлигини қайд этган.
Изоҳ (0)