Германияда коронавирус билан боғлиқ оғир вазият туфайли 16 декабрдан бошлаб камида 10 январга қадар давом этувчи қатъий локдаун жорий этилади. Deutsche Welle’нинг хабар беришича, бу ҳақда 13 декабрь, якшанба куни канцлер Ангела Меркель маълум қилган.
Бутун мамлакат бўйлаб озиқ-овқат ва кундалик маҳсулотлар сотиладиган дўконлардан ташқари барча чакана савдо дўконлари ёпилади. Мактабларда кундузги таълим тўхтатилади, болалар боғчалари ёпилади. Компанияларга эса ўз фаолиятини вақтинча тўхтатиш ёки ходимларини масофавий ишлашга ўтказиш тавсия этилган.
Озиқ-овқат дўконларидан ташқари, дорихоналар, атторлик дўконлари, бензоколонкалар, банклар, жамғарма кассалари ва почта бўлимлари очиқ қолади.
24—26 декабрь кунлари Рождество байрамини 14 ёшгача бўлган болаларни ҳисобга олмаганда 5 кишидан кўп бўлмаган тор доирада, оилавий тарзда нишонлашга рухсат берилган. Янги йил (31 декабрь ва 1 январь) байрамига эса йиғилишлар ўтказиш тақиқланади, фуқароларга фейерверкларни отмаслик тавсия этилган.
Локдаун пайтида ибодатхоналарга боришга рухсат берилади, фақат ижтимоий масофаланиш ва ниқоб тақиш режимига риоя этиш лозим.
Бундан ташқари, 16 декабрдан 10 январгача фуқароларга Германиянинг бошқа ҳудудларига ёки чет элга чиқишдан воз кечиш тавсия этилади, жуда зарур бўлган ҳолатлар бундан мустасно.
Локдаун туфайли зарар кўрган корхоналар ҳукуматдан кенгроқ ёрдам олиши мумкин. Кўрсатиладиган ёрдамнинг максимал миқдори 200 дан 500 минг еврогача оширилади, аммо тўғридан-тўғри ёки билвосита банкрот бўлиш хавфи остида бўлган компаниялар учунгина татбиқ этилади. Товарларнинг нархи бўйича йўқотишлар учун компенсация бериш ҳам кўзда тутилган.
Эслатиб ўтамиз, Германияда коронавирус билан боғлиқ чекловлар 10 январгача узайтирилиши мумкинлиги ҳақида 3 декабрь куни маълум бўлганди. Мамлакатда COVID-19 оқибатидаги ўлимлар сони рекорд даражада ўсмоқда.
Бавария бош вазири Маркус Зёдер чекловларнинг узайтирилишини «тўғри» қарор деб ҳисоблайди. Унинг таъкидлашича, коронавирус билан боғлиқ вазият «ҳеч ҳам яхшилангани йўқ, балки аксинчадир».
Вирус тарқалишини реал вақт режимида кузатиб келаётган Жонс Ҳопкинс университети маълумотларига кўра, айни пайтда дунёда коронавирусга чалинганлар сони 71 миллиондан ошди. Шу сабабли дунёнинг кўплаб мамлакатларида вирусга қарши курашиш йўлида чеклов чоралари кучайтирилмоқда.
Хусусан, Украинада 2021 йил 8 январдан қатъий карантин жорий этилади, Москвада коронавирус туфайли чеклов чоралари 15 январгача, Латвияда COVID-19 туфайли жорий қилинган фавқулодда ҳолат режими 11 январгача узайтирилди. Швейцарияда ниқоб тақмаганлар 230 евро жаримага тортилиши белгиланди, Эстонияда 14 декабрдан бошлаб барча таълим муассасалари вақтинчалик ёпилади.
Изоҳ (0)