Американинг Pfizer ва Германиянинг BioNTech компаниялари томонидан ҳамкорликда ишлаб чиқарилган вакцинанинг илк партиялари АҚШ вакцинация марказларига 14 декабрь, душанба куни етказиб берилишни бошлайди. Бу ҳақда Warp Speed вакцинация дастури раҳбари генерал Густав Перна маълум қилди, деб ёзади «РБК».
Пернанинг сўзларига кўра, айни пайтда ишлаб чиқарувчи дорини қадоқламоқда, кейинги бир кеча-кундуз мобайнида у почта бўлинмаларига етказилади, улар эса ўз навбатида, бутун мамлакат бўйлаб 636 та вакцинация марказига етказиб беради.
Бундай марказларнинг 145 таси вакцинанинг биринчи партияларини 14 декабрь, душанба куниёқ қабул қилиб олади. Қолганларига эса чоршанба кунигача етказилади. Касалликлар назорати ва профилактикаси марказлари (CDC) ҳисоб-китобларига кўра, вакцинациянинг биринчи ҳафтасида марказларга 2,9 миллион доза дори тақсимланади. 2020 йил охиригача Америка ҳукумати 40 миллион кишини эмлашни режалаштирмоқда.
Жойлардаги вакцинация учун штатлар ҳукуматлари ва маҳаллий соғлиқни сақлаш департаментлари масъул бўлади. Биринчи навбатда тиббиёт ходимлари, шунингдек, беморлар ва кексаларни парвариш қилиш муассасалари ходимлари эмланиши кутилмоқда.
12 декабрь куни АҚШ Озиқ-овқат маҳсулотлари ва дори воситаларини назорат қилиш бошқармаси (FDA) Pfizer ва BioNTech компаниялари томонидан яратилган коронавирусга қарши вакциналардан фойдаланишга рухсат берди.
АҚШ президенти Дональд Трампнинг маълум қилишича, вакцинанинг биринчи дозасини юбориш ишлари «24 соатдан камроқ вақт ичида» амалга оширилади.
Американинг Pfizer фармацевтик гиганти билан бирга COVID-19’га қарши вакцина яратган Германиянинг BioNTech биоинжиниринг компанияси раҳбари Угур Шаҳин АҚШда вакцинация жараёни нормал кечган ҳолда, 2021 йил ёзи охирига келиб, коронавирус инфекцияси пандемиясини назорат остига олишга муваффақ бўлиш мумкинлиги ҳақида айтиб ўтди.
Сўнгги маълумотларга кўра, АҚШда пандемия бошидан буён 16 020 646 киши коронавирусга чалинган, 297 575 киши касалликдан вафот этган.
Изоҳ (0)