Hyundai Motor Group ва SoftBank молиявий конгломерати Boston Dynamics роботларини ишлаб чиқарувчини сотиб олиш борасидаги битимларнинг асосий шартларини келишиб олди. Жанубий Корея концерни компаниянинг 80 фоизга яқин акциясига, SoftBank эса 20 фоизли улушига эга бўлади. Ушбу харид Hyundai’га 921 миллион долларга тушди, деб хабар беради Motor.
Hyundai томонидан 2019 йилда тақдим этилган Strategy 2025 йўл харитасида компания «ақлли мобил» оператори сифатида тасвирланган ва унинг асосий фаолият йўналиши белгилаб олинган: Smart Mobility Device (SMD) ва Smart Mobility Service (SMS). SMS аббревиатурасида персоналлаштирилган хизмат ва контентлар яширинган, SMD эса «ақлли» қурилмаларнинг кенг доираси ҳисобланади, хусусан, дронлар ва роботлар. Мазкур йўналишни ривожлантиришга АҚШ Мудофаа вазирлигининг истиқболли тадқиқот лойиҳаларида муваффақиятга эришган Boston Dynamics ёдам беради.
Boston Dynamics’нинг робототехникадаги тажрибаси Hyundai Mobis (автоном бошқарув тизими) ва Hyundai Glovis (логистика), шунингдек, Hyundai Motor’нинг ўзига ёрдам беради. Кореяликлар мазкур соҳадаги етакчиликни эгаллаш ниятида, шу сабабли омбор ва саноат корхоналаридаги хизмат кўрсатиш соҳаларининг сервис ҳамда логистикасига роботларни жорий этишни режа қилган.
Маълумот учун, робототехникага ихтисослашган Boston Dynamics компаниясига Марк Райберт ва Массачусетс технологиялар институтининг бир гуруҳ муҳандислари томонидан 1992 йилда асос солинган. 2013 йил охирида компанияни Google сотиб олган, 2017 йилда эса Япониянинг йирик инвестори — SoftBank. 2020 йилда Boston Dynamics саккизта роботлар моделини тақдим этди, хусусан, антроморф Atlas роботини ҳам.
Аввалроқ Boston Dynamics’нинг робот-ити 74,5 минг доллардан сотувга чиққани, у Сингапур боғида одамлар орасидаги оралиқ масофани текширишни бошлагани тўғрисида хабарлар берилганди.
Изоҳ (0)