ОАВда роботлар ишлаб чиқариш билан шуғулланувчи Boston Dynamics компанияси сотилиши мумкинлиги тўғрисида хабарлар тарқалди: Bloomberg, The Robot Report ва The Korea Economic Daily маълумотларига кўра, харидор — Hyundai Motor Cо. Вазиятдан хабардор манбаларнинг сўзларига кўра, мазкур битим 921 миллион долларни ташкил этмоқда, деб хабар беради Motor.
Робототехникага ихтисослашган Boston Dynamics компаниясига Марк Райберт ва Массачусетс технологиялар институтининг бир гуруҳ муҳандислари томонидан 1992 йилда асос солинган. 2013 йил охирида компанияни Google сотиб олган, 2017 йилда эса Япониянинг йирик инвестори — SoftBank. 2020 йилда Boston Dynamics саккизта роботлар моделини тақдим этди, хусусан, антроморф Атлас роботини ҳам.
Бостон компанияси бутун дунёда машҳурликка эришган, унинг ҳар бир ролиги миллионлаб маротаба томоша қилинади. Сўнгги вақтлар ичида Boston Dynamics 400 та роботини сотган бўлиб, бу компания 30 миллион доллардан ортиқ даромад келтирган.
Шу билан бирга, Hyundai’нинг саноат роботлари ва бошқа замонавий техникаларни яратиш билан шуғулланувчи ўз бўлинмаси ҳам бор. Масалан, 2019 йилда компания Elevate концептини тақдим этганди — у қадам ташлаб юришга ва деворларга тирмашиб чиқишга қодир.
Аввалроқ Boston Dynamics’нинг робот-ити 74,5 минг доллардан сотувга чиққани, у Сингапур боғида одамлар орасидаги оралиқ масофани текширишни бошлагани тўғрисида хабарлар берилганди.
Изоҳ (0)